Mekem Ol Visit Bakegen Wetem Wan Plan Long Tingting Blong Yu
1 Taem yu mekem wan visit bakegen, yu mas traehad blong yusum wan vas, we bambae i givim moa save long poen blong Baebol we yu bin tokbaot lastaem.
2 Wan plan we yu save gat long tingting blong yu taem yu visitim bakegen ol man we oli bin karem magasin, hemia blong statem wan rod magasin. Maet i gud blong yusum wan isi fasin blong storeyan olsem hemia:
◼ “Mi hop se yu glad long Wajtaoa we mi livim wetem yu lastaem, we i tokbaot from wanem yumi mas fraet long God. Tede mi karem wan Wekap! we i askem kwestin ya: ‘?From Wanem Laef i Sot Tumas?’ ?Yu ting se hemia i wan gudfala kwestin?” Maet yu save gohed olsem: “Tok blong Jisas long Jon 3:16 we ol man oli savegud long hem, oli givim promes blong laef we i no save finis. Plis karem magasin ya mo letem strong hop we Tok blong God i givim i leftemap tingting blong yu.” Nao yu save eksplenem se bambae yu kambak blong karem ol nyufala magasin i kam, mo blong storeyan moa long promes blong God long ol man we oli obei long hem. No fogetem se evri taem yu karem magasin i go long wan man, yu save makem wan visit long ripot blong yu.
3 Sipos yu bin livim magasin ya “Wan Wol We i No Moa Gat Faet—?Wetaem?” maet yu save talem se:
◼ “?Laef long wol ya bambae i olsem wanem sipos i no moa gat faet? [Wet long ansa.] Mi glad blong soem long yu wanem we God i promes blong mekem.” Ridim Ol Sam 37:10, 11, mo eksplenem se wol bambae i olsem wanem taem ol samting we God i wantem oli kamaot long hem. Talem bakegen long man ya, prea we Jisas i tijim long ol disaepol blong hem long Matyu 6:9, 10. Halpem hem blong tingting dip long mining blong ol tok blong Jisas. Sipos man ya i bin karem ol magasin nomo, askem hem blong mekem sabskripsen mo mekem plan blong kambak bakegen blong storeyan moa.
4 Sipos yu gobak blong storeyan moa long ol haf we oli tokbaot kwestin long fored blong magasin “?From Wanem Laef i Sot Tumas?” maet yu save statem storeyan blong yu olsemia:
◼ “Lastaem mi mi kam, yumitu bin tokbaot se laef i sot nomo. Olsem yu bin luk long ol haf blong Wekap!, ol man blong sayens oli save givhan long yumi blong laef kasem 70 no 80 yia nomo. ?Be wanem tingting blong yu long promes blong Baebol? [Wet long ansa.] Baebol i soem se God i stap tingbaot blong mekem samting we i moa gud long ol man.” Nao yu save ridim Jon 17:3, mo eksplenem olsem wanem fasin blong kasem moa save i save lidim hem blong kasem laef we i no save finis. Nao maet yu save askem hem blong statem wan Baebol stadi, no mekem plan wetem hem blong storeyan long Baebol bakegen.
5 Wan impoten plan we i mas stap long tingting blong yumi taem yumi mekem minista wok blong yumi, i blong statem ol Baebol stadi. Maet yu bin mekem plante visit long wan man we i bin karem ol magasin. Maet yu glad blong traem fasin ya blong storeyan wetem hem nekis taem:
◼ “Ol man oli gat plante defren tingting long saed blong skul, mo sipos skul i save givhan long laef blong yumi tede. I gat ol defren bilif long kwestin ya, ?From wanem God i letem ol fasin nogud oli stap yet? mo ?From wanem yumi kam olfala mo yumi ded? Samfala oli wantem save olsem wanem blong prea mo olsem wanem yumi mas mekem blong God i harem ol prea blong yumi.” Nao openem wan buk we yumi yusum blong stadi Baebol wetem ol man, mo soem wan haf we yu ting se bambae man blong haos i intres long hem. Nao blong smoltaem, soem olsem wanem blong mekem wan Baebol stadi.
6 Jeova i wan God we oltaem i mekem ol samting wetem wan stampa tingting. I gud yumi traem folem fasin blong hem long Oktoba, taem yumi mekem ol visit wetem wan plan long tingting blong yumi.