Folem Fasin Blong Bigfala Tija Taem Yu Yusum Buk Ya Baebol Tijim
1. ?Jisas i tij olsem wanem?
1 Oltaem Bigfala Tija ya, Jisas, i eksplenem ol samting long fasin we i klia mo i isi. Samtaem hem i askem long ol man we oli lesin long hem blong oli talemaot tingting blong olgeta. Hem i mekem olsem from hem i wantem we oli yusum tingting blong olgeta. (Mat. 17:24-27) Hem i pulum tingting blong olgeta i go long Tok blong God. (Mat. 26:31; Mak 7:6) Hem i lukaotgud blong no givim plante tumas save wantaem long ol disaepol blong hem, hem i save se olgeta bambae oli lanem ol save ya yet. (Jon 16:12) Jisas i wantem save tu sipos ol disaepol blong hem oli bilif mo oli kasem save long ol tijing we hem i givim long olgeta. (Mat. 13:51) Oli wokem buk ya Baebol Tijim, blong givhan long yumi blong tijim ol man long sem fasin olsem Jisas.
2. ?Olsem wanem yumi save yusum ol faswan kwestin long ol wanwan japta?
2 Ol Faswan Kwestin: Taem yu stat blong stadi long wan japta, i gud we yu pulum tingting blong studen i go long ol faswan kwestin we oli stap aninit long stamba tok. Askem ol kwestin ya blong wekemap intres blong hem, i no nid blong hem i ansa long olgeta. Be sipos yu wantem, yu save askem long hem blong i traem givim wan smol ansa long ol kwestin ya. I no nid blong yu tokbaot ol ansa blong hem mo stretem evri rong tingting we hem i talemaot. Yu save talem tangkiu from we hem i talemaot tingting blong hem mo yu save gohed long stadi. Ol tok we hem i talem long saed blong ol faswan kwestin ya bambae i givhan long yu blong save sipos yu nidim blong spenem moa taem blong tokbaot sam haf blong japta ya i bitim ol narafala haf.
3. ?Olsem wanem yumi save mekem stadi long fasin we i isi nomo?
3 Ol Vas: Stadi i mas stanap long Baebol. (Hib. 4:12) Be i no nid blong ridim evri vas we i stap long buk. Pulum tingting blong studen i go long ol vas we oli pruvum bilif blong yumi. Maet i no nid blong yu ridim ol narafala vas we oli givim moa save long saed ya. Buk ya Baebol Tijim i soemaot trutok long fasin we i no had. I gud yu mekem stadi long fasin we i isi nomo. Pulum tingting i go long ol impoten poen, mo no spenem tumas taem blong tokbaot evri smosmol samting we oli joen wetem. Mo tu, yu no nidim blong tokbaot save we i kamaot long wan narafala buk, sipos poen i klia finis.
4. ?Olsem wanem blong kasem save sipos yumi mas tokbaot wan poen long Diksonari long taem blong stadi?
4 Diksonari: I gat 14 poen long Diksonari we oli joen wetem ol haf blong buk ya. Yu nomo yu save jusum sipos yu mas tokbaot ol poen ya long taem blong stadi, no nogat. Long sam poen, maet yu leftemap tingting blong studen, blong hem nomo i ridim olgeta, antap moa sipos hem i kasem save mo i agri long ol save long japta we yutufala i stadi long hem. Olsem nao, sipos yutufala i stap stadi long japta 4, “?Hu Ya Jisas Kraes?” mo studen i bilif finis se Jisas i Mesaea, i no nid blong tokbaot haf ya “Jisas Kraes—Mesaea Ya We Ol Profet Oli Bin Tokbaot.” Long sam narafala taem, blong givhan long studen, maet i gud blong tekem taem blong tokbaot samfala haf, no olgeta haf, blong wan poen long Diksonari.
5. ?Sipos yumi jusum blong tokbaot wan poen long Diksonari, yumi save mekem olsem wanem?
5 Sipos yu jusum blong tokbaot wan poen long Diksonari, yu save rerem ol kwestin fastaem mo tokbaot ol haf wetem kwestin mo ansa. Sipos no, yu save tekem sam minit long taem blong stadi blong tokbaot ol save ya, folem nid blong studen. Hemia bambae i mekem yu yu sua se hem i kasem save long ol haf ya we hem i bin ridim hem wan.
6. ?Olsem wanem yumi save yusum bokis blong tingtingbak long en blong wanwan japta?
6 Bokis Blong Tingtingbak: Plante taem ol toktok long bokis we i stap long en blong wanwan japta oli ansa long ol faswan kwestin long stat blong japta. Yu save yusum ol toktok ya blong tingtingbak long ol impoten poen blong japta. Sam pablisa oli luk se i gud blong ridim ol wanwan poen wetem studen, mo maet ol vas we oli joen wetem. Biaen, oli askem long hem blong i eksplenem smol, olsem wanem ol vas ya oli pruvum se ol poen oli tru. Fasin ya i soemaot long tija sipos studen i kasem save gud ol impoten poen blong japta mo olsem wanem ol poen ya oli stanap long Baebol, mo sipos hem i agri long olgeta no nogat. Hemia i trenem studen tu blong i save yusum Baebol blong eksplenem trutok long ol narafala.
7. ?Olsem wanem blong yusum buk ya Baebol Tijim blong mekemgud wok blong yumi?
7 Rod we i wokgud moa blong tijim ol man mo mekem disaepol, hemia blong folem fasin blong Jisas blong tij. (Mat. 28:19, 20) Buk ya Baebol Tijim i save givhan long yumi blong mekem olsem. Yusumgud buk ya blong tijim ol narafala long trutok long fasin we i klia, i isi, mo i pulum intres blong olgeta.