Sam Haf Blong Buk Ya Baebol Tijim We Yumi Save Yusum

Taem wan Baebol stadi i kasem save long samting we Baebol i rili tijim mo i folem, bambae hem i gohed gud mo i gat gudfala frut long laef blong hem. (Sam 1:1-3) Yumi save yusum sam haf long buk ya Baebol Tijim blong givhan moa long hem.

Ol Kwestin Long Stat Blong Japta: Long stat blong japta, i gat ol kwestin we japta ya i ansa long olgeta. Yu save ridim ol kwestin ya blong studen i tingrere long samting we bambae hem i lanem, no yu save askem long hem blong i talemaot tingting blong hem long ol kwestin ya. Sipos ansa blong hem i rong, i no nid blong stretem long taem ya. Ol ansa blong hem bambae oli givhan long yu blong yu kasem save ol poen we yu mas eksplenem mo mekem i klia moa.—Prov. 16:23; 18:13.

Diksonari: Sipos studen i kasem save long japta mo i agri long hem, yu save pulum hem blong i lukluk ol narafala save we i stap long Diksonari. Nao long nekis stadi, yu tekem smoltaem blong meksua se hem i kasem save. Be sipos yu ting se i nidim, taem yutufala i stap stadi, yu save tekem taem blong tokbaot ol save long Diksonari no haf blong hem. Yutufala i ridim, mo yu askem sam kwestin we yu rerem finis.

Bokis Blong Tingtingbak: Bokis we i stap long en blong japta i talem ansa blong ol kwestin long stat blong japta. Yu yusum ol ansa ya blong meksua se stadi blong yu i kasem save long ol bigfala poen mo i save eksplenem. Yutufala i ridimaot ol poen wanwan wetem ol vas we i sapotem olgeta. Nao yu askem long hem blong i yusum ol vas ya blong eksplenem from wanem ol ansa oli stret.—Wok 17:2, 3.