Soem Intres Long Man—Lukluk Fes Blong Olgeta
1 Taem yumi prij long ol pablik ples mo long ol haos wanwan, plante taem, bifo we yumi toktok, yumi lukluk ol man we yumi wantem toktok wetem olgeta, mo olgeta tu oli lukluk yumi. Long smoltaem ya we yumi lukluk fes blong olgeta, maet yumi naf blong kasem save wanem filing blong olgeta long saed blong yumi, mo maet yumi luksave sipos oli haremgud no nogat. Long sem fasin, olgeta tu oli naf blong luksave plante samting long saed blong yumi. Wan woman i talem long saed blong wan Witnes we i go long haos blong hem i se: “Wanem we mi makem long saed blong fes blong hem we i stap smael, hemia we hem i gat pis long tingting blong hem. From samting ya, mi wantem lesin long hem.” Hemia i openem rod blong woman ya i lesin long gud nius.
2 Lukluk fes blong ol narafala i wan gudfala rod blong pulum ol man blong toktok taem yumi stap prij long rod no long sam narafala pablik ples. Wan brata i lukluk fes blong olgeta we oli stap wokbaot i kam klosap long hem. Taem oli lukluk hem, hem i smael, mo biaen, hem i soemaot ol magasin. Taem hem i folem fasin ya, hem i storiangud wetem plante man mo i seremaot plante magasin.
3 Luksave Filing Blong Ol Narafala: Sipos yumi lukluk fes blong ol narafala, hemia bambae i givhan long yumi blong luksave filing blong olgeta. Olsem nao, sipos wan man i harem se i had blong kasem save long yumi, no i no agri long samting we yumi talem, plante taem fes blong hem i soemaot samting ya. Sipos hem i bisi mo i wantem aot, bambae yumi kasem save long samting ya taem yumi lukluk fes blong hem. Long taem olsem yumi save jenisim no sotem tok blong yumi. Kasem save long filing blong ol narafala i wan gudfala rod blong soemaot se yumi intres long olgeta.
4 Toktok We i Kamaot Long Hat Mo i Soem Bilif: Long plante kantri, fasin ya blong lukluk fes blong narafala i pruvum se man we i toktok i talem samting we i kamaot long hat blong hem. Makem olsem wanem Jisas i ansa taem ol disaepol blong hem oli askem se: “?Be hu nao bambae i save kasem laef?” Baebol i talem se: “Jisas i lukluk [“fes blong,” NW] olgeta, i talem se, ‘Samting ya, i strong tumas blong man i mekem, be God i save mekem olgeta samting.’ ” (Mat. 19:25, 26) I sua se fes blong Jisas i soemaot bilif blong hem, mo samting ya i mekem se tok blong hem i gat moa paoa. Long sem fasin, taem yumi lukluk fes blong man, hemia bambae i givhan long yumi blong talemaot gud nius blong Kingdom wetem ful hat blong yumi mo wetem bilif.—2 Kor. 2:17, NW; 1 Tes. 1:5.