Fasin Blong Glad Blong Wok i Karem Blesing
1. ?Olsem Deved mo Nehemaea tufala i soemaot se tufala i glad blong wok?
1 Taem Golaeat i stap jikim ol soldia blong Isrel, eniwan long olgeta i save girap mo go kilim hem. Be i gat wan long olgeta nomo we i glad blong mekem olsem. Wan boe we i stap lukaot long sipsip, mo we i no tren nating blong faet, i girap mo i go kilim Golaeat. (1 Saml. 17:32) Taem ol man Jiu oli gobak long Jerusalem afta we oli kam fri long Babilon, oli no wokem stonwol blong Jerusalem bakegen. Wan man we wok blong hem i blong kafsaedem waen blong king blong Pesia, hem nao i askem blong lego hae posisen blong hem, mo go long Jerusalem blong lukaot long wok ya. (Neh. 2:5) Jeova i blesem tufala tugeta, Deved mo Nehemaea, from gudfala fasin ya we tufala i glad blong wok.—1 Saml. 17:45, 50; Neh. 6:15, 16.
2. ?From wanem ol Kristin oli mas soemaot se oli glad blong wok?
2 Tede, ol man long wol ya oli no glad blong wok. Long ol “las dei” (NW ) ya, ol man oli bisi tumas long laef blong olgeta, mo plante oli “tingbaot olgeta nomo.” (2 Tim. 3:1, 2) I isi blong wan man i bisi tumas long ol prapa bisnes blong hem, nao hem i no moa tekem janis blong mekem wok blong givhan long ol narafala, taem i gat nid blong mekem olsem. Be yumi ol Kristin, yumi wantem folem fasin blong Jisas, we hem i no wet long narafala blong askem hem blong givhan. (Jon 5:5-9; 13:12-15; 1 Pita 2:21) ?Olsem wanem yumi save soemaot se yumi glad blong wok, mo wanem ol blesing we yumi save kasem?
3. ?Olsem wanem wan man we i glad blong wok i givhan long ol miting blong kongregesen?
3 Mekem Wok Blong Ol Brata Blong Yumi: Long ol miting, yumi save givim ansa long ol haf we i gat kwestin mo ansa. Taem yumi mekem olsem, yumi givim ‘wan presen’ long saed blong spirit i go long ol narafala. (Rom 1:11, NW ) Taem yumi givim ansa, yumi leftemap nem blong Jeova, yumi mekem trutok i stap strong moa long tingting mo hat blong yumi, mo yumi glad moa blong stap long ol miting. (Sam 26:12) Yumi save glad tu blong mekem wan tok long Tiokratik Skul taem wan we i mas mekem tok ya i no stap. Hemia bambae i mekem se yumi kamgud moa long fasin blong tij.
4. ?Wanem sam narafala rod blong soemaot se yumi glad blong wok?
4 Ol brata oli save soemaot se oli glad blong wok taem oli traehad blong kasem ol wok insaed long kongregesen. (Aes. 32:2; 1 Tim. 3:1) Yumi evriwan i save givhan blong mekem se ol asembli oli ron gud, sipos yumi rere blong givhan long ol defren wok long taem ya. Taem yumi glad blong wok wetem seket elda long wok blong prij no blong mekem rere kakae blong hem, bambae ‘bilif blong hem i save givhan long yumi, olsem we bilif blong yumi tu i save givhan long hem.’ (Rom 1:12) Taem yumi givhan long ol pikinini we oli no gat papa, ol wido, olgeta we oli sik mo handikap, ol mama we oli gat ol smosmol pikinini, mo ol narafala long kongregesen, yumi kasem glad mo Jeova i glad long yumi.—Prov. 19:17; Wok 20:35.
5. ?Wanem wok long saed blong ol Haos Kingdom we i nidim se man i glad blong wok?
5 Wan narafala rod blong yusum taem mo paoa blong yumi blong givhan long ol narafala, hemia taem yumi joen blong klinim mo riperem Haos Kingdom. Mo tu, from we plante man oli stap kam long trutok, i nidim plante moa Haos Kingdom mo plante moa man blong wokem ol Haos Kingdom ya. Wan hasban wetem waef blong hem, tufala i talemaot long Regional Building Committee long ples blong olgeta, se tufala i glad blong wok, nating se tufala i no gat save long wok blong bildim haos. Sloslo, oli trenem tufala ya mo naoia tufala i stap mekem wok ya blong putum brikis. Waef ya i talem se: “Taem mitufala i wok wetem ol narafala, mifala i frengud wetem olgeta. Long en blong dei, mitufala i taed we i taed, be mitufala i haremgud tumas long saed blong spirit.”
6. ?From wanem wok blong prij i impoten moa i bitim ol narafala wok we yumi mas glad blong mekem?
6 Long Wok Blong Prij: Wok ya we i impoten moa we yumi mas glad blong mekem tede, hemia wok blong prij. Taem yumi givhan long ol man blong oli kasem save ol rul blong Baebol mo folem olgeta, ol man ya oli gat wan mak blong kasem long laef blong olgeta mo oli kasem paoa blong winim ol rabis fasin. Oli putum tingting blong olgeta i stap strong long ol blesing we Baebol i soemaot long saed blong fiuja. Taem yumi givhan long olgeta blong oli kasem save blong Baebol, yumi mekem wan gudfala wok we i karem glad long yumi mo i givim blesing long ol narafala we i stap longtaem. (Jon 17:3; 1 Tim. 4:16) Maet ol samting long laef blong yumi i mekem se yumi save spenem moa taem long wok ya. Yumi save mekem wok blong haftaem no fultaem paenia, yumi save muv i go long wan ples we i nidim moa man blong prij, no yumi save lanem wan narafala lanwis.
7. ?From wanem i impoten moa we yumi glad blong wok tede?
7 King Deved i talem profet tok ya se taem bambae Mesaea i statem rul blong hem olsem King, ol man blong God bambae oli “glad blong mekem wok.” (Sam 110:3, NW, futnot) Jeova i stap mekem se wok ya blong hivimap ol laswan man i spid, taswe i gat plante moa wok we yumi save glad blong mekem. (Aes. 60:22) ?Yu yu talem finis se: “ ‘!Mi ya, mi save go! !Yu sanem mi!’ ”? (Aes. 6:8) Yes, sipos yumi soemaot se yumi glad blong wok, yumi mekem Jeova i glad mo yumi kasem plante blesing tu.