!Ol Nambawan Jenis Long Wajtaoa!
1 Long stat blong yia ya, ol kongregesen oli kasem wan nambawan mesej: Stat long Jenuware 2008, Wajtaoa bambae i kamaot tu taem long wan manis, be faswan bambae i defren long sekenwan. Wan i blong ol man long pablik mo narawan i blong ol Kristin brata sista nomo. Be maet yu askem se: ‘?Olsem wanem tufala magasin ya bambae i defren? ?From wanem i gud blong gat tu defren magasin? ?I gat sam niufala samting we bambae i kamaot long tufala magasin ya?’
2 Ol Samting We i Mekem Se Tufala i Defren: Wajtaoa we i kamaot long namba 1 blong evri manis, hem i Magasin blong Pablik. Ol haf we oli stap insaed long magasin ya, oli stret long ol man we oli no Witnes blong Jeova. Wajtaoa we i kamaot long namba 15 blong evri manis, hem i Magasin blong Stadi mo bambae yumi no seremaot magasin ya long ol man long wok blong prij. Long magasin ya, bambae i gat olgeta stadi atikol blong wan manis, mo sam narafala atikol tu we oli stret blong ol man we oli givim laef blong olgeta long Jeova. Ol save we oli stap long Magasin blong Pablik, oli no jes givhan long yumi we i Witnes nomo be oli givhan tu speseli long ol man we oli no Witnes be maet oli bilif long Baebol. Ol save we oli stap long Wekap! bambae i givhan long enikaen man, ol man we oli no bilif mo ol man we oli no Kristin tu.
3 Ol Gudfala Samting: Long Magasin blong Stadi, yumi no moa nid blong eksplenem ol tok olsem tok ya “paenia” blong halpem ol man we oli no Witnes blong kasem save long hem. Ol toktok insaed long magasin ya, bambae oli stret long ol man blong Jeova mo ol Baebol studen we oli stap gohed gud long saed blong spirit. ?Olsem wanem long Magasin blong Pablik? From we ol save insaed long magasin ya mo stael blong raetem bambae i go stret long ol man long pablik, wan man we i no Witnes bambae i glad blong ridim ol tok blong hem long stat go kasem en. I tru se evri Witnes blong Jeova bambae oli haremgud blong ridim tufala magasin ya. Evri manis bambae yumi seremaot wan Wajtaoa mo wan Wekap! nomo. From samting ya, yumi gat wan ful manis blong kam moagud long ol fastok blong yumi.
4 Ol Niufala Samting: I gat sam nambawan samting we bambae i kamaot long Magasin blong Pablik. Wan hemia se magasin ya bambae i tokbaot ol stamba tijing blong Baebol long wan fasin we i isi blong man i kasem save long hem. Narafala samting hemia se magasin ya bambae i soemaot olsem wanem Baebol i save halpem ol famle. Bambae i gat wan haf blong stadi Baebol we i tokbaot ol samting we ol yangfala oli intres long hem. Long Wajtaoa ya, oltaem bambae i gat wan haf we i tokbaot ol vas blong Baebol we i tijim yumi long ol fasin blong Jeova.
5 Yumi prea se Jeova bambae i blesem niufala jenis ya we bambae yumi mekem long Wajtaoa. Olsem Wekap!, maet Wajtaoa ya bambae i kasem plante moa man we oli wantem harem gud nius.—Mat. 10:11.