Oli Wokem Ol Magasin Blong Yumi Blong Enikaen Man i Ridim
1. ?Slef we i stret mo waes i folem fasin blong aposol Pol olsem wanem?
1 Aposol Pol i jenisim fasin blong hem blong talemaot gud nius long ol man we oli gat “ol defdefren kaen fasin.” Slef we i stret mo waes i mekem i sem mak. Slef ya i yusum ol magasin blong talemaot gud nius long ol man we oli kamaot long ol defdefren kalja, kastom mo bilif. (1 Kor. 9:22, 23) I gud yumi tingbaot se oli wokem ol magasin ya blong wanem kaen man i ridim. Long rod ya, yumi save yusum gud ol Wajtaoa mo Wekap!
2. ?Oli wokem Wekap! blong wanem kaen man i ridim?
2 Wekap!: Magasin ya i blong ol man olsem olgeta ya we aposol Pol i singaot olgeta se “ol man Atens.” (Wok 17:22) Ol man Atens ya oli no Kristin mo oli gat smol save nomo long Baebol. Long sem fasin, oli wokem Wekap! blong ol man we oli gat smol save nomo, no blong ol man we oli no save Baebol nating. Maet ol man ya oli no save nating ol Kristin tijing, maet oli no trastem nating ol jos mo maet oli no luksave se Baebol i save givhan long man. Stamba risen from wanem oli wokem Wekap! i blong pruvum se i gat wan tru God i stap. Mo tu, magasin ya i blong mekem bilif we man i gat long Baebol i kam strong moa, mo blong halpem man we i ridim blong kasem save se ol Witnes blong Jehova oli defren long ol narafala jos.
3. ?Wajtaoa blong pablik i blong hu, mo Wajtaoa blong stadi i blong hu?
3 Wajtaoa: Magasin blong pablik i kamaot long Inglis mo Franis. Mo tu ol fas haf blong hem i stap long Bislama Wajtaoa. Magasin ya i blong ol man we oli gat respek long God mo long Baebol. Ol man ya oli gat sam save long Baebol, be oli no kasem save gud ol tijing blong hem. Olgeta ya oli olsem ol man ya we Pol i tokbaot se oli stap “mekem wosip long God.” (Wok 13:14-16) Magasin blong stadi i blong ol Witnes blong Jehova. Pol i save se olgeta we oli ridim leta blong hem, oli save Baebol mo oli gat stret save long trutok. (1 Kor. 1:1, 2) Long sem fasin, ol stadi atikol i blong olgeta we oli stap kam long ol miting blong yumi, mo oli save ol wod mo ol tingting we ol Witnes oli yusum.
4. ?From wanem yumi mas save gud Wajtaoa mo Wekap!?
4 Plante taem yumi givim wan Wajtaoa mo wan Wekap! long man, be yumi tokbaot wan nomo. Nating se i olsem, yumi mas save gud tufala magasin ya. Olsem nao, bambae yu save wanem magasin we man bambae i ridim.