Wosipim Jeova Wetem Famle Blong Yu
1 Long taem ya we oli raetem Baebol, ol memba blong famle oli mekem plante samting tugeta. Oli joengud oltaem blong mekem wok blong olgeta mo oli soemaot oltaem se oli wantem wosipim Jeova olsem wan famle nomo. (Lev. 10:12-14; Dut. 31:12) Tede, long plante ples, ol memba blong famle klosap oli no moa joen tugeta blong mekem samting. Be ol trufala Kristin oli luksave se i impoten blong famle i joen wanples blong mekem ol defren wok, antap moa ol samting we oli joen wetem wosip blong olgeta. !God ya we i stamba blong famle i glad tumas blong luk ol famle oli joen wanples blong mekem wosip long hem!
2 Famle i Prij Tugeta: Taem famle i joen wanples blong talemaot gud nius, samting ya i save mekem famle i joengud moa. Nating se ol elda oli prij wetem ol defdefren brata mo sista insaed long Kongregesen, be oli mas mekem plan tu blong prij wetem waef mo pikinini blong olgeta. (1Tim. 3:4, 5) Nating se ol seket elda oli bisi tumas, be oli mas faenem taem blong prij wetem waef blong olgeta.
3 Ol papa mo mama we oli prij wetem ol pikinini blong olgeta, oli naf blong halpem olgeta blong oli gohed gud mo kam ol man blong talemaot gud nius. Ol pikinini bambae oli luk olsem wanem papa mama blong olgeta i glad mo i haremgud long wok blong prij. Be tu bambae oli luk olsem wanem papa mama oli soemaot lav we oli gat long Jeova mo ol man. (Dut. 6:5-7) Fasin ya blong prij wetem pikinini i impoten tumas. Be fasin ya i no godaon taem pikinini i kam bigman. Wan man wetem woman blong hem tufala i prij oltaem wetem trifala pikinini boe blong tufala we fasbon i gat 21 yia mo lasbon i gat 15 yia. Papa ya i talem se: “Evri taem mitufala i tijim olgeta long sam samting. Mo mitufala i meksua se mitufala i mekem long fasin we oli glad long hem mo oli no save fogetem.”
4 Rere Gud Tugeta: Ol famle oli faenem se i gud blong rerem wok blong prij tugeta. Plante taem, pikinini i laekem blong joen long ol praktis we famle i mekem taem oli rerem wok blong prij. Oli save aktem pablisa no man blong haos. Samfala oli tekem sam minit afta famle stadi blong mekem samting ya.
5 Bambae yumi glad moa sipos yumi joen wetem olgeta ya we yumi laekem olgeta tumas, blong mekem impoten wok ya we i mekem yumi haremgud. I naes tumas blong luk ol memba blong famle we oli wok tugeta blong prij long ol haos wanwan, mekem ol visit, mo mekem ol Baebol stadi. Taswe yu we yu stap wosipim Jeova wetem famle blong yu, yu save glad mo talem olsem Josua se, “Long saed blong mi mo famle blong mi, bambae mifala i mekem wok blong Jeova.”—Jos. 24:15, NW.