Baebol Stadi Blong Tajem Hat Blong Ol Man
1 Jisas i wantem tumas blong mekem ol samting we Papa blong hem i wantem mo hem i givhan long ol narafala man blong olgeta tu oli mekem wok blong Jeova. (Sam 40:8; Mat. 9:37, 38; 11:28-30) Be hem i no stap talemaot gud nius nomo. Sipos yumi wantem we ol man we yumi stadi wetem olgeta oli kam pablisa, yumi mas tajem hat blong olgeta. Blong kasem mak ya, i no naf we yumi tekem wan buk, ale yumi mekem toktok wetem kwestin mo ansa. Sipos yumi gat plan blong tajem hat blong olgeta, yumi mas tingbaot olgeta taem we yumi mekemrere stadi blong olgeta.
2 Jisas i tingbaot ol narafala. Hem i stap tingbaot tingting we ol narafala man oli gat. Hem i yusum ol pijatok blong mekem se ol man oli kasem save ol bigfala poen we hem i tijim long olgeta. (Matiu Japta 5 kasem 7) Jisas i save finis wanem kaen trabol ol man we oli lesin long hem bambae oli kasem, taswe hem i givim ol gudfala advaes long olgeta. (Mak 9:33-37) Taem ol man we oli lesin long hem oli no kasem save long ol samting we hem i stap talem, Jisas i soemaot longfala tingting mo hem i yusum ol pijatok blong mekem se i moa isi long olgeta. (Mat. 16:5-12) Jisas i gat bigfala intres long ol narafala, taswe yumi wanwan i save tingbaot kwestin ya, se: ‘?Sipos mi nao mi stap long ples blong man ya we i stadi, wanem poen mi mas save long hem, ale bambae mi klia long ol samting we mi lanem? ?Wanem samting i save pusum mi blong mekem Baebol i wok long laef blong mi?’—Ridim 1971 Yearbook, pej 246 mo 247.
3 Yumi Mas Tokbaot Baebol Fastaem: Wan pablisa i givim witnes long wan man mo long woman blong hem. Biaen, mifala i askem long tufala from wanem tufala i kam kwiktaem nomo long trutok. Tufala i ansa se: “Evri samting i stap long Baebol.” Yes, Tok blong God i save tajem hat. (Hib. 4:12) Yumi mas yusum Baebol oltaem mo jekemap ol vas we oli stap long ol haf we yumi ridim. Yumi mas halpem studen blong yumi blong hem i luksave from wanem wan fasin i waes, mo narafala fasin i krangke nomo. Yumi mas pulum hem blong hem i tingtinggud, ale biaen hem i savegud from wanem fasin blong obei long ol loa blong God i gud long hem.—Ridim Wajtaoa (Engglis) blong Ogis 1, 1984, pej 15-16. (wF 1/11/84, p.15-16)
4 Plante pablisa oli luksave se blong tokbaot Baebol fastaem, i gud blong yusum Reasoning buk. Sipos man ya we yu stadi wetem i save ridim Engglis no Franis, ?olsem wanem nao? ?Yu tingbaot finis blong yusum Reasoning buk wetem hem? Tingbaot eksampel ya: Yu stap stadi wetem wan man long Save buk, pej 88, haf 20. Ale, man ya i askem from wanem pasta blong hem i talem se sam pikinini oli stap ded from we God i jusumaot olgeta blong oli stap wetem hem long heven. Sipos yu tekem Reasoning buk long pej 99, [Franis, 254] long haf ya se “?From wanem ol smol pikinini tu oli stap ded?”, haf ya i soemaot klia se Jeova i tinghae long ol famle mo hem i wantem se ol famle oli joengud tugeta. Ol gudfala poen ya oli save halpem man ya, ale hem i gat strong tingting se God i laekem tumas ol man.
5 Yumi Mas Askem Sam Kwestin: Jisas i gat gudfala fasin blong yusum ol kwestin, taswe hem i pulum ol man blong oli mekemap maen blong olgeta mo oli tingtinggud long ol samting we oli stap mekem. (Mat. 17:24-27) Taem yumi stadi wetem wan man, ol ansa we hem i givim oli halpem yumi blong luksave ol poen we hem i kasem save long hem finis. Mo tu, ol ansa ya oli soemaot klia ol rong tingting blong hem, we hem i holemtaet long olgeta yet. Wan eksampel: Maet wan stadi i wantem we hem i no moa smok. Yu yu stadi finis wetem hem long japta 13 haf 10 blong Save buk, mo yutufala i storeyan finis long Wekap! blong Janewari-Maj 1999 pej 19-21. Hem i save finis se hem i mas stop long fasin ya. ?Be olsem wanem blong save sipos hem i gat strong tingting blong lego long sigaret? Ale, yu save talem long hem se: “?Wanem tingting blong yu? ?Bambae yu mekem wanem sipos ol fren blong yu oli jikim yu from we yu no moa smok?”
6 I gat wan samting bakegen we yu mas rere long hem. Samtaem, ol ansa we ol man oli givim long ol kwestin ya oli save mekem yu yu sapraes, no maet tingting blong yu i foldaon from. ?Bambae yu yu mekem wanem? Sipos bisnes ya i no isi tumas, maet i moa gud blong talem se: “Bambae yumi stop long ples ya tede. Nekis taem bambae yumi tokbaot poen ya.” No: “Yes, hemia wan poen we yumi mas tingtinggud long hem.” (Jon 16:12) From we yu save tingting blong man ya long wan samting, i gud blong faenemaot ol gudfala poen we oli save halpem hem blong hem i gohed long saed blong spirit. Yumi mas wok had blong tajem hat blong ol man mo yumi mas prea long Jeova blong hem i givhan long olgeta blong oli kam strong moa long saed blong spirit.—1 Korin 3:5-9.
7 I gat wan narafala samting bakegen we yumi save mekem blong givhan long olgeta. Oli mas kasem save long ogenaesesen blong Jeova long wol, mo wantem joen long hem. Ale, yu save yusum buklet ya Ol Wetnes blong Jeova—Oli Joengud. Mo yu save soemaot ol video kaset blong Sosaeti. Yu save invaetem olgeta oli kam long wan miting long Haos Kingdom. Biaen, bambae oli save se ogenaesesen ya i gud olsem wanem.
8 Taem we yumi mekem wan Baebol stadi, yumi mas tekem inaf taem blong mekem man ya i tingtinggud long ol poen we yumi stap tokbaot. Taem we yumi tij, yumi mas lukaot gud long ol nid blong ol man. Yumi mas pulum man we yumi stadi wetem hem, blong hem tu i laekem Jeova mo i soemaot respek long hem, long Baebol mo long ogenaesesen blong Jeova. Yes, bambae yumi evriwan i gohed nomo blong givhan long ol narafala man, blong bambae oli kam man blong Jisas. !Yes, bambae yumi traehad blong mekem ol gudfala Baebol stadi!—Ol Wok 2:41-46.