?Hu i Save Stadi Long Baebol?
1 Profet Amos i bin talemaot se bambae i gat hadtaem blong kasem kakae long Isrel. Hem i talem se: “Bambae yufala i hanggri tumas, mo yufala i tosta tumas, be i no from wota. Long taem ya, bambae yufala i wantem tumas blong harem tok blong mi.” (Amos 8:11) Blong halpem ol man we oli hanggri mo tosta long saed blong spirit, ogenaesesen blong Jeova i stap seremaot plante buk long saed blong Baebol raonabaot long wol.
2 Kam kasem naoia, oli prentem finis 67 milyan kopi blong buk Save mo 79 milyan kopi blong buklet ya Wanem. Yumi glad from we tufala buk ya oli klia mo oli gat paoa. Samting ya i mekem i moa isi long yumi blong tijim trutok long narafala. Be bighaf blong ol man we oli bin kasem wan buk no traket, oli no stat blong stadi Baebol wetem yumi yet. ?Yumi save mekem wanem long saed ya?
3 !Evri Man We i Tekem Wan Buk i Save Kam Wan Stadi! Tingbaot ekspiryens blong wan pablisa. Long faswan taem we hem i prij long wan woman, hem i askem sipos woman ya i wantem stadi Baebol. Wantaem nomo woman ya i agri. Biaen woman ya i talem se: “Yu nao yu faswan blong askem sipos mi mi wantem stadi Baebol.” Long teritori blong yu, ?i gat sam man we oli tekem buk blong yumi finis, we oli save talem sem samting? Tru tumas, evri buk we yumi seremaot i givim jans long yumi blong gobak blong mekem visit mo askem man sipos hem i wantem stadi.
4 From we plante taem yumi mitim ol man we oli gat buk blong yumi finis, ?olsem wanem yumi save pulum intres blong olgeta blong lanem wanem we i stap insaed long ol buk ya? Wan Witnes i askem stret long woman blong haos sipos hem i gat eni kwestin long saed blong Baebol. Woman ya i talem se hem i no gat. Be sista ya i talem bakegen se: “Mi sua se yu gat sam.” Nao woman blong haos i talem se hem i gat sam kwestin, mo long rod ya tufala i statem wan Baebol stadi. Maet yu tu yu save askem man blong haos sipos hem i wantem faenem tingting blong Baebol long saed blong wan kwestin no poen we hem i stap tingbaot. I gud sipos yu rere blong askem wan kwestin we i pulum intres blong hem, sipos hem i no save tingbaot wan samting blong askem. Fasin blong prij olsem i save openem rod long yumi blong halpem ol man, blong oli save stadi long ol stamba trutok blong Baebol.
5 Fasin blong statem ol Baebol stadi i wan impoten haf blong minista wok blong yumi. From we yumi no save se hu bambae i wantem stadi long Baebol, yumi no mas mestem jans blong askem evri man we yumi mitim blong hem i stadi. Tru long prea, i gud yu askem Jeova blong givhan long yu, mo biaen, yu save mekem wok we i laenap wetem prea blong yu. !Maet i no longtaem bambae yu askem wan man blong stadi Baebol mo hem i akseptem!—1 Jon 5:14, 15.