Program Blong Nekis Spesel Dei Asembli
Stamba tok blong program blong spesel dei asembli blong sevis yia 2008, hemia “Yumi Olsem Graon—Jeova i Man Blong Wokem Graonpot” we i stanap long Aesea 64:8. Program ya bambae i givhan long yumi blong soemaot moa tangkiu from waes, stret fasin, paoa, mo lav blong Jeova we i Bigfala Man ya blong Wokem Graonpot.
Seket elda bambae i givim tok ya, “Wok Olsem Wan Graonpot We i Karem Ona Long Wok Blong Prij.” Tok ya bambae i soemaot olsem wanem plante moa man oli glad long nambawan blesing ya blong save trutok mo talemaot long narafala. Tok ya “Fasin Blong Tingting Dip Bambae i Lukaotgud Long Yu” bambae i soemaot olsem wanem ol stret rul blong Jeova oli save lukaotgud long yumi taem yumi tingting dip long olgeta. Brata blong branj ofis we i visitim yumi bambae i givim tufala tok ya “No ‘Letem Fasin Blong Yufala i Kam Olsem Fasin Blong Ol Man Long Wol’ ” mo “Letem Bigfala Man Blong Wokem Graonpot i Jenisim Fasin Blong Yu.” Tufala tok ya “Ol Yangfala We Jeova i Wantem Yusum Olgeta” mo “Impoten Wok Blong Papa Mo Mama Taem Tufala i Stap Wokem Ol Gudfala Fasin Long Hat Blong Pikinini,” bambae i leftemap tingting blong ol papa mama mo ol yangfala. Bambae yumi glad blong luk sam pleplei mo lesin long samfala we ol brata oli askem kwestin long olgeta, blong luk olsem wanem ol brata mo sista blong yumi oli stap karem gudfala frut long wok blong prij. Olgeta we oli wantem baptaes blong soem se oli givim laef blong olgeta long God, oli mas talem long presiden elda kwiktaem nomo. Meksua se yu karem Wajtaoa blong yu i kam long spesel dei asembli ya.
Bigfala Man ya blong Wokem Graonpot bambae i lidim ol samting blong mekem stamba tingting blong hem i kamtru. Be i stap long yumi wanwan blong letem hem i jenisim yumi. Olgeta we oli folem ol rul blong Jeova mo letem Jeova i jenisim fasin blong olgeta, oli waes, mo oli save kam naes, oli save saen gud, olsem wan naes graonpot we Jeova i save yusum. Taem yumi letem Jeova i jenisim yumi, yumi stap leftemap hae rul blong hem mo yumi kasem plante blesing.