Program Blong Nekis Spesel Dei Asembli

Stamba tok blong program blong spesel dei asembli blong sevis yia 2009, hemia “Lukaotgud Long Wok Blong Masta, . . . Blong Yu Finisimgud Wok Ya,” we i stanap long Kolosi 4:17 (NW). From we yumi Kristin, yumi tinghevi long advaes ya. Mak blong yumi i blong finisimgud wok ya olsem Jisas i bin mekem. (Jon 17:4) Aposol Pol tu i soemaot wan nambawan eksampol long yumi long saed ya. Hem i gat strong tingting blong finisimgud wok ya we Jeova i givim long hem.—Wok 20:24.

Long taem ya, seket elda bambae i soemaot olsem wanem sam pablisa oli stap winim ol samting we oli traem wok blong olgeta blong prij. Mo biaen bambae i gat tok ya “Lukaotgud Long Ol Samting We Yu Planem.” Tok ya bambae i soemaot olsem wanem yumi save givhan gud long ol man we oli “stret blong kasem laef blong olwe.” (Wok 13:48, NW) Wan brata blong branj ofis we i visitim yumi, bambae hem i tokbaot ol wanwan vas blong 2 Korin 6:1-10 long tok ya, “?Olsem Wanem Yumi Save Soemaot Se Yumi Naf Blong Stap Olsem Man Blong Wok Blong God?” Long aftenun bambae brata ya i givim wan narafala tok we stamba blong hem “Tinghae Long Wok Blong Prij.” I sua se tufala tok ya, “Yangfala Mo Olfala i Haremgud Long Wok Blong Prij” mo “Ol Yangfala We Oli Lukaotgud Blong Finisimgud Wok Ya Blong Prij,” bambae tufala i leftemap tingting blong yu. Olgeta we oli wantem tekem baptaes blong soem se oli givim laef blong olgeta long God long spesel dei asembli no seket asembli, oli mas talem samting ya kwiktaem long presiden elda. Wan narafala impoten haf blong ol asembli blong yumi, hemia Wajtaoa Stadi. I gud yu karem Wajtaoa we bambae yumi stadi long hem long wik blong spesel dei asembli.

Blong lukaotgud se yumi finisimgud wok ya blong prij, yumi mas traehad blong no letem ol narafala wok no samting we yumi intres long hem, oli tekem ples blong wok ya we Jeova i putum long han blong yumi. Ol gudgudfala advaes long Baebol we bambae oli kamaot long taem blong spesel dei asembli ya, bambae oli givhan long yumi blong kasem save wanem samting we yumi nidim blong mekem blong tingting blong yumi i stap oltaem long samting we i moa impoten long laef blong yumi, mo blong tingting gud long wanem we yumi stap mekem blong finisimgud wok we Jeova i givim long yumi.