Spesel Wok Blong Serem Traket Oktoba 20–Novemba 16
1 Stat long Mande, Oktoba 20, bambae yumi joen blong fo wik long wan spesel wok blong seremaot traket ya ?Yu Yu Wantem Save Trutok? Yumi hop se spesel kampen ya long ful wol bambae i pulum plante man blong oli soem intres long Baebol, we hem nomo i stamba blong trutok.—Jon 17:7.
2 Traket ya i givim ansa we i klia mo i sot long sikis impoten kwestin: “?God i rili kea long yumi?” “?Faet mo fasin safa bambae i finis samtaem?” “?Wanem i hapen long yumi taem yumi ded?” “?Ol dedman bambae oli laef bakegen samtaem?” “?Olsem wanem mi save prea blong God i harem mi?” “?Olsem wanem mi save glad long laef?” Olgeta jos blong Krisendom oli no save givim ol stret ansa long ol kwestin ya. Sam man we oli no Kristin, olgeta tu oli stap tingbaot ol kwestin ya. Maet oli no kasem save se ol klia ansa oli stap insaed long Baebol. Taswe traket ya bambae i save pulum intres blong plante defren kaen man.
3 Finisim Ol Teritori Blong Yufala: Traehad blong prij long olgeta haos long teritori blong yufala. Sipos teritori i bigwan, maet ol elda oli talem long yufala blong lego traket long haos we i no gat man long hem, long faswan taem we yufala i prij long hem. Tingbaot ol man we oli stap klosap long yu, ol famle, olgeta we yu mitim long ples blong wok no skul, mo ol narafala we yu storian long olgeta oltaem, yu save givim wan traket long olgeta. Maet yu save mekem plan blong joen long wok blong haftaem paenia long manis Oktoba no Novemba. ?Yu yu gat wan pikinini no wan Baebol studen we i stap gohed gud, mo hem i naf blong kam wan pablisa we i no baptaes mo joen long spesel wok ya wetem yumi? Sipos yes, yu yu save toktok wetem ol elda long saed ya.
4 ?Yu Save Talem Wanem?: Blong traket ya i kasem moa man, i gud blong mekem tok blong yumi i sot nomo. Askem wan long ol sikis kwestin we oli stap long fored blong traket, mo soem ansa we i stap insaed long traket. Fasin olsem bambae i mekem se ol pablisa oli save jenisim fastok blong olgeta blong mekem i laenap wetem fasin blong tingting blong ol man long teritori. Sipos wan man i soem intres, yu save raetemdaon nem blong hem mo ol narafala samting we yu nidim blong save long saed blong hem, nao yu save go luk hem bakegen. Long wiken long taem blong serem traket, yumi save givimaot ol magasin tu. Afta we yumi finisim wok ya long Novemba 16, bambae yumi givimaot buk ya Baebol Tijim. Ol traket we oli stap, bambae yumi yusum long wok blong prij olsem yumi yusum ol narafala traket.
5 Statem Wan Baebol Stadi: Oli wokem traket ya speseli blong givhan long yumi blong statem ol Baebol stadi. Taem yu visitim man we i bin soem intres, yu save askem long hem, se: ‘?Wanem trutok blong Baebol we i mekem yu yu glad, no i mekem we yu yu no moa wari?’ Yu save soem laswan pej blong traket we i tokbaot fasin blong stadi Baebol, mo yu save givim buk ya Baebol Tijim long hem. Sipos man ya i glad, tekem smol taem blong soem sam moa save long hem, long wan no tu paragraf long japta we i laenap wetem trutok blong Baebol we hem i jusum.
6 Jeova i stap lukaot ol man we bambae oli wosipim hem long “spirit mo trutok.” (Jon 4:23, NW) !I gud yumi evriwan i joen long spesel wok ya blong halpem ol narafala blong oli save trutok!