Ansa Long Wan Kwestin

◼ ?Papa Mama tugeta i save kaontem aoa taem tufala i mekem famle stadi evri wik?

Baebol i putum wok long Papa nao blong ‘stretem ol pikinini mo tijim olgeta’ olsem we Jeova i wantem. Nating se i olsem, papa mama i joen tugeta blong tijim ol pikinini. (Efes. 6:4) Baebol i talem long ol pikinini se: “Pikinini blong mi, yu yu mas lesin gud long ol samting we mi wetem mama blong yu, mitufala i stap tijim yu long hem, mo yu no mas lego ol samting ya.” (Prov. 1:8) Wan impoten haf blong tijing we ol papa mama oli givim long pikinini, hemia famle Baebol stadi.

Long ol yia we oli pas, wan long tufala nomo i save kaontem aoa blong famle stadi wetem ol pikinini we oli no baptaes, nating se tufala i joen long stadi ya. Hemia we i lidim stadi ya, hem nomo i kaontem aoa. Be naoia, samting ya i jenis. Sipos papa mo mama tugeta i joen evri wik blong tijim ol pikinini long famle stadi, ale tufala tugeta i save kaontem wan aoa evri wik long ripot blong tufala. I tru, ol papa mama oli spenem bitim wan aoa evri wik blong tijim ol pikinini blong olgeta. Blong trenemgud pikinini, tufala i mas wokhad oltaem. (Dut. 6:6-9) Be ripot blong wok blong prij i blong soemaot fastaem wanem we yumi mekem evri manis long wok blong prij afsaed long famle. Taswe, nating se stadi i longfala bitim wan aoa, no maet papa mama i mekem stadi tu no tri taem long wan wik, no tufala i mekem stadi wetem ol pikinini wanwan, be tufala i mas kaontem wan aoa nomo evri wik long ripot blong tufala. Wan long tufala nomo bambae i kaontem Baebol stadi ya long ripot blong hem, mo bambae hem i kaontem wan visit evri taem we tufala i mekem stadi ya.