Ansa Long Wan Kwestin
◼ ?Taem yumi putum ripot blong prij evri manis, i stret blong makem Baebol stadi we yumi mekem wetem ol pikinini blong yumi?
Sipos wan Kristin papa no mama i mekem Baebol stadi wetem ol pikinini blong hem we oli no baptaes yet, papa no mama ya i save kaontem wan aoa blong stadi ya evri wik, wan visit blong stadi ya evri wik, mo wan Baebol stadi blong evri manis. Nating sipos stadi we yumi mekem i bitim wan aoa, nating sipos yumi mekem tu no tri taem long wan wik, nating se yumi mekem stadi long wanwan long ol pikinini blong yumi, be yumi mas kaontem olsem we yumi jes talem antap.—Yu save luk buk ya Minista Wok Blong Yumi, pej 99-100.
Sipos ol pikinini insaed long famle oli baptaes finis, oli Witnes blong Jeova, ale papa mama i no save kaontem taem mo stadi ya long ripot blong prij (be sipos wan long ol pikinini, we i jes baptaes, i no finis yet blong stadi long namba tu buk, ale yu save kaontem long ripot). Risen blong samting ya, hemia se ol ripot blong prij we yumi givim long kongregesen oli blong soemaot hamas wok we kongregesen i stap mekem blong talemaot gud nius mo tijim trutok blong Baebol long ol man we oli no givim laef long Jeova yet mo oli no tekem baptaes. (Mat. 24:14; 28:19, 20) Be, samting ya i no min se famle stadi i no impoten. I gud we papa mama i traehad blong mekem stadi ya evri wik.
Hem i wok blong ol Kristin papa mama nao blong mekem stadi long ol pikinini blong olgeta. Sipos i gat sam long yumi we oli wantem save olsem wanem blong statem stadi wetem famle blong olgeta, no maet oli wantem mekem se stadi ya i kam gud moa, oli save askem help long ol elda. Sipos i gat sam samting we i mekem se i moagud blong wan narafala pablisa i mekem Baebol stadi wetem wan boe no gel we i no baptaes yet, be famle blong hem oli Witnes blong Jeova, i gud yumi luk presiden elda, no elda we i lukaot long wok blong prij. Sipos ol elda oli agri, ale pablisa ya bambae i makem stadi ya long ripot blong hem, sem mak olsem ol narafala Baebol stadi.
Taem we papa mama i spenem mo traehad we oli mekem blong trenem ol pikinini folem rod we Jeova i wantem, oli bigwan moa i bitim samting we wan ripot blong prij i save soem. (Dut. 6:6-9; Prov 22:6) Yumi presem ol Kristin papa mama we oli stap mekem bigfala wok ya blong “stretem ol [pikinini blong olgeta], mo blong trenem tingting blong olgeta olsem we Jeova i wantem.”—Efes. 6:4, NW.