“Talemaot Gud Nius Fulwan”—Taem Yu Prij Long Ol Stori Haos
1. ?Blong “talemaot gud nius fulwan” long sam kantri yumi mas tingbaot blong prij wea?
1 Yumi gat sem tingting olsem aposol Pol we i wantem tumas blong “talemaot gud nius fulwan.” (Wok 20:24, NW) Taswe yumi traem bes blong yumi blong toktok wetem plante moa man long teritori blong yumi blong oli harem nius blong Kingdom. Long sam kantri, plante man oli stap long ol stori haos. Samtaem i gat sam samting oli blokem yumi blong yumi no save go insaed long ol stori haos ya. Be i gat plante man oli stap long ol ples olsem, mo hemia ol gudfala ples blong mekem we gud nius i kasem plante moa man.
2. ?From wanem i impoten we yumi mas yusum fasin luksave mo fasin we yumi waes gud taem yumi prij long ol stori haos?
2 From we ol stilman mo raf fasin i kam antap, plante stori haos ya oli lokem gud mo oli gat ol man blong sekiuriti no ol kamera. (2 Tim. 3:1, 2) Maet i gat rul i stap long sam stori haos se sipos i no gat man long stori haos ya we i singaot yu blong kam, ale yu no gat raet blong kam insaed. Sipos man we i lukaot long haos ya, no maneja blong hem, i luk we yumi kam blong prij long ples ya, maet hem i save talem long yumi blong aot, antap moa sipos wan long ol man we oli laef insaed long stori haos ya i komplen long saed blong yumi. Taswe i impoten we yumi gat fasin luksave mo yumi waes gud long samting we yumi mekem.
3. ?Wetaem i stret blong prij long ol man long ol stori haos, mo from wanem?
3 ?Wetaem Blong Prij Long Ol Stori Haos?: Long evri ples we yumi prij long hem, yumi traem prij long taem we man i stap long haos. Sem samting ya nao we yumi mas mekem taem yumi prij long ol man long ol stori haos. Sipos yumi stap go oltaem long wan stori haos taem ol man blong hem oli no stap, ol man oli save ting se yumi wan man blong stil. Plante pablisa oli faenem se i gat man i stap long sapa, mo long Sarede mo Sande aftenun. Sipos yumi prij long ol ples ya eli tumas long moning, antap moa long ol wiken, ol man oli save komplen i go long maneja blong stori haos.
4, 5. ?Olsem wanem yumi save go insaed long ol stori haos we oli lokem men doa blong olgeta?
4 Taem Yu Kasem Raet Blong Go Insaed: Ol pablisa oli no mas toktok wetem maneja no eni man we i lukaot long stori haos ya bifo we oli kam blong prij. Sipos men doa blong stori haos ya i lok, mo i gat wan smol spika long doa blong hem, yumi save yusum smol spika ya we i olsem wan kaen telefon, blong ring i go long ol man we oli laef insaed long stori haos ya, blong traem faenem wan man we i glad blong storian wetem yumi. Sipos wan man i glad blong storian, hem i save letem yumi go insaed long stori haos ya, nao afta we yumi storian wetem hem, maet yumi save go long ol narafala man insaed long stori haos ya. Be yumi mas gat fasin luksave taem yumi mekem olsem, blong luk sipos i stret no nogat. Samtaem i moagud yumi goaot bakegen mo yumi yusum smol spika blong kasem ol narafala man insaed long haos ya. Yumi mas waes tu blong jusum hamas man insaed long stori haos ya we bambae yumi toktok wetem olgeta long smol spika ya, long taem ya we yumi kam prij long haos ya.
5 Sam man oli laekem moa we yu gohed blong toktok long smol spika ya nomo. Sipos i olsem, i gud yu toktok wetem kaen fasin mo glad. Samtaem oli putum nem blong ol man klosap long namba blong olgeta long smol spika. Sipos i olsem i gud yu talem nem blong man ya we yu toktok long hem. Toktok blong yu i mas sot mo klia taem yu talem long man ya wanem we yu wantem tokbaot wetem hem. Sam brata sista oli openem smol buk ya Statem Wan Storian nao oli ridim wan fastok we i stap.
6. ?Yumi save mekem wanem sipos stori haos ya i gat wan sekiuriti blong hem?
6 Sipos stori haos ya i gat wan sekiuriti blong hem mo hem i no letem yumi go insaed, yumi save prij long hem. Plante man we oli mekem wok ya oli laekem tumas blong ridim ol buk blong yumi. Maet yumi save statem Baebol stadi tu wetem man olsem, mo maet yumi mekem stadi long ples ya nomo we hem i wok long hem. Sipos yumi faenem wan man long stori haos ya we hem i intres blong storian, nao sekiuriti i letem yumi blong go insaed long stori haos ya, i gud yumi go luk man ya nomo we i intres. Yumi no mas tekem janis blong go kilkilim ol doa blong ol narafala man insaed long stori haos ya blong traem toktok wetem olgeta.
7. ?Yumi mas tingbaot wanem long saed blong basket we yumi karem blong prij?
7 Fasin Mo Lukluk Blong Yumi: Sipos yumi karem ol bigbigfala bag no basket blong prij, bambae yumi pulum ae blong ol man. Taswe maet i gud yumi karem wan basket we i smol nomo no maet yumi no nid blong karem wan basket nating. Sam pablisa oli tekem nomo wanem buk we oli wantem tokbaot mo oli putum long wan smol folda, ale oli karem Baebol long han blong olgeta, no sipos i wan smol Baebol, oli putum long poket traoses no sot blong olgeta.
8. ?Wanem rod blong folem taem wan grup i go prij long ol stori haos?
8 I moagud yumi no hivap long ol bigbigfala grup fored long wan stori haos no long ples blong putum trak we i stap klosap long hem. Hemia bambae i pulum ae blong ol man. Mo tu, yumi mas lukaotgud taem yumi prij long ol eria we i gat plante raf fasin mo fasin blong brekem loa. (Prov. 22:3) Olsem nao, sipos i gat 4 no 6 pablisa oli go insaed long wan stori haos blong prij, i gud oli stap tugeta long sem stori nomo blong oli save harem olgeta sipos i gat trabol i kamaot. Maet oli save mekem se, taem tu i stap toktok long wan man long doa, ol narafala oli wet long tufala.
9. ?Olsem wanem yu save soem respek, mo from wanem hemia i impoten?
9 Taem yu go insaed long wan stori haos, i gud yu waepem sus blong yu long mat we i stap fored long men doa, mo meksua se yu satem gud doa biaen long yu. Taem yu soem se yu gat respek olsem, bambae yu mekem we ol man blong haos ya oli no komplen long saed blong yu. Taem yu go insaed finis, i gud yu go stret long ol step, no eleveta, we i go kasem stori we yu wantem go long hem, i bitim we yu stap hangraon klosap long ples we ol man oli stap kam insaed long hem. Fasin ya i save pulum ae blong ol man nao oli save gat tingting se yu kam blong mekem wan nogud samting.
10. ?Olsem wanem blong no mekem tumas noes insaed long wan stori haos?
10 Long plante stori haos, smol noes we yu mekem i save saon laod tumas. Taswe taem yu toktok long man blong haos, i gud yu toktok wetem voes we i naf nomo blong hem i harem yu. Taem yu stap storian wetem ol narafala pablisa, yu mas lukaot we voes blong yu i no laod tumas. I moagud we voes blong yu i kwaet be i stret tu blong man i no gat nogud tingting long yu. Taem i gat plante doa oli laen folfolem olgeta long wan stori, sam pablisa oli kilkilim wan doa long wan en finis, ale oli go kilkilim wan doa long nara en, oli no kilkilim wan doa afta narawan. Oli luk se long rod ya nao oli no mekem tumas noes. Mo tu, i nogud blong kilkilim doa strong tumas, hemia i save mekem ol man oli fraet.
11. ?Wanem sam samting we yu save mekem taem man i lukluk yu long smol hol long doa?
11 Long sam doa, maet i gat wan smol hol we i olsem wan ae we man insaed long haos i save lukluk i kam afsaed blong save hu i kilkilim doa. Sipos i olsem, i gud yu mo fren blong yu, yutufala i stanap stret fored long ae ya. Lukluk i go stret long ae ya, mo taem yu luksave se man blong haos i lukluk i kam, i gud yu smael, talem halo, mo statem fastok blong yu. Sipos man blong haos i askem se, ‘?Yu yu hu?’ i gud yu talem nem blong yu mo fren blong yu. Samting ya i save mekem we man i no fraet blong openem doa. Sipos hem i no openem doa, i oraet, yu gohed nomo blong storian long hem.
12. ?Yumi save mekem wanem blong i no gat problem i kamaot taem yumi lego wan buk long haos blong man we i no stap?
12 Taem i No Gat Man Long Haos: Plante man we oli gat wok blong lukaot long ol stori haos, oli stap komplen from we oli stap faenem ol buk olbaot long graon insaed mo afsaed long stori haos. Yu mas tingbaot se sipos yu lego ol pepa no buk afsaed long wan doa, i isi nomo blong oli foldaon long graon mo man i ting se oli doti nomo. Taswe, sipos yu wantem lego wan buk long haos blong wan man we i no stap, yu mas faenem wan ples we buk ya bambae i save haed fulwan long hem, blong man we i wokbaot fored long doa ya i no save luk buk ya nating.
13. ?Yu save mekem wanem sipos yu mitim wan man we i kros?
13 Taem Man Blong Haos i Kros: Sipos yu mitim wan man we i kros long yu nao maet i wantem singaot man we i lukaot long stori haos ya, i gud yu aot long stori we haos blong man ya i stap long hem, yu klaem i go long wan narafala stori mo yu traem kambak long wan narafala taem. Samtaem maet i moagud yu aot fulwan long stori haos ya blong mekem se man we i lukaot long stori haos ya i no rao mo tok kros long yu. Nating sipos man blong haos i no talem stret long yu se i no moa wantem we yu kam luk hem, be i gud yu makem namba blong haos blong hem, mo putum i go wetem map blong teritori. Wanwan taem, i stret blong prij long olgeta ya bakegen, olsem we yumi stap go visitim ol narafala man we oli talem se oli no wantem we yumi go long haos blong olgeta.
14, 15. ?Yu mas mekem wanem sipos wan man we i lukaot long wan stori haos i talem long yu blong yu aot?
14 Sipos Oli Askem Yu Blong Aot: Sipos yu stap prij gud long wan stori haos nao man we i lukaot long ples ya, no wan sekiuriti, no wan man we i wok blong fiksimap ol samting long haos ya, no eni man we i bos long haos ya, i talem long yu blong yu aot, i waes blong yu aot kwiktaem. Yumi no wantem gat trabol wetem ol man ya, nao oli putum yumi long kot no oli singaot polis i kam. Plante taem, ol man we oli lukaot no oli wok insaed long ol stori haos oli no agensem ol Witnes blong Jeova, be oli mas mekem wok blong olgeta blong meksua se i no gat trabol i kasem ol man insaed long haos ya.
15 Samtaem, taem man we i lukaot long stori haos ya i askem yu blong yu aot, maet yu gat janis blong talem long hem, wetem kaen fasin, risen from wanem yu kam. (1 Pita 3:15) Yu mas tingbaot se wok blong hem i blong meksua se ol man we oli laef long stori haos ya oli no kasem trabol mo i no gat denja. Maet man ya i save letem yu yu prij long stori haos ya. Be sipos i no letem yu, i gud yu aot nomo we yu no traem agiu wetem hem. Sipos yu luk se i stret, yu save askem man ya sipos yu save pas wanwan taem blong putum sam magasin long rum daon long stori haos ya we i ples we ol man oli stap kam insaed long hem, no long ples we ol man blong haos ya oli stap kam long hem blong wasem klos blong olgeta. (Kol. 4:6) Ol samting we i hapen long wan stori haos, yu mas talemaot long brata we i lukaot long wok blong prij long kongregesen.
16. ?Sipos traehad we yumi mekem blong prij long wan stori haos i no karem frut, yumi save mekem wanem?
16 Afta we sam taem i pas, ol pablisa oli save yusum waes fasin blong traem prij bakegen long wan stori haos we man i bin sakemaot yumi long hem fastaem. Be sipos trabol i gohed, ol elda oli mas talemaot samting ya long branj ofis blong i givhan long olgeta. I moagud blong mekem olsem i bitim we wanwan pablisa nomo i traem winim problem ya hem wan. Sipos ol pablisa oli no save go insaed long stori haos ya blong prij, i gat narafala rod i stap blong prij long ol man blong haos ya. Maet yumi yusum telefon nomo no raetem leta. Sam pablisa oli wokbaot long ol rod mo ples klosap long stori haos ya, blong traem prij long ol man blong haos ya taem oli aot blong go long wok long eli moning no taem oli kambak long wok long sapa.
17. ?From wanem i impoten blong prij long ol stori haos tu?
17 I no longtaem nao, rabis fasin blong wol ya bambae i lus. Ol man we oli singaot long nem blong Jeova, olgeta ya nomo bambae oli sef. “?Sipos ol man oli no harem nius ya, bambae oli save bilif long hem olsem wanem? ?Mo sipos oli no bilif long hem, bambae oli save singaot long God olsem wanem?” (Rom 10:13-15) Plante long olgeta “we oli stret blong kasem laef blong olwe” oli stap long ol stori haos ya. (Wok 13:48, NW) Sipos yumi waes mo yumi gat fasin luksave, bambae yumi save talemaot gud nius ya long olgeta.