“Mi Mekem Ol Samting Ya From Gud Nius”
1. ?Wan man blong talemaot Kingdom i rere blong mekem wanem blong ol narafala, mo from wanem?
1 Aposol Pol i harem se wok ya blong talemaot gud nius long ol man, hem i wok we hem i mas mekem. (1 Kor. 9:16, 19, 23) Long sem fasin, sipos yumi wantem tumas we ol man oli gat gudfala laef olwe, bambae yumi traehad long evri rod blong talemaot gud nius long olgeta.
2. ?Wanem samting we yumi rere blong jenisim long saed blong wok blong prij, mo from wanem?
2 Prij Long Ol Ples Mo Taem We Man i Stap: Wan man blong pulum fis i no sakem string no net blong hem long ples mo taem we hem nomo i wantem, be hem i go long ples mo long taem we hem i save se fis bambae i stap. Yumi, we yumi “man blong pulum man,” yumi save mekem olsem man blong pulum fis. Maet yumi nidim blong jenisim sam samting long program no fasin blong yumi, blong yumi save faenem ol man long teritori blong yumi. Long rod ya, bambae yumi save glad moa long wok ya blong pulum “ol naranarafala fis” oli kam. (Mat. 4:19; 13:47) ?Maet yumi save prij long ol haos wanwan long sapa, no maet yumi save prij long rod long eli moning? Pol i wantem “talemaot gud nius fulwan.” Ale, taem hem i luk wan gudfala janis i stap blong i talemaot gud nius long ol man, hem i tekem janis ya.—Wok 17:17; 20:20, 24, NW.
3, 4. ?Taem yumi stap prij, olsem wanem yumi save mekem tok blong yumi i stret long man, mo wanem frut i save kamaot from?
3 Jenisim Ol Tok Blong Yu Blong Mekem i Stret Long Man: Ol man blong pulum fis oli jenisim fasin blong olgeta blong kasem fis folem wanem kaen fis we oli wantem kasem. ?Olsem wanem yumi save talemaot gud nius blong Kingdom long wan fasin we i save pulum intres blong ol man long teritori blong yumi? Tingbaot wan samting we bighaf blong ol man long ples blong yumi oli stap wari long hem no we oli stap tokbaot plante. Ale, tokbaot samting ya wetem olgeta, long fasin we i soemaot se yumi tingbaot filing blong olgeta. Nao yumi mas lesingud long wanem we oli talem long saed ya. (Jem. 1:19) Maet yumi save askem wan kwestin long olgeta blong pulum olgeta blong talem tingting blong olgeta. (Prov. 20:5) Long rod ya bambae yumi save talemaot gud nius long wan fasin we i stret wantaem long laef blong ol man. Taem Pol i mitim ol man we “oli gat ol defdefren kaen fasin,” be hem i ‘mekem olsem we hem tu i gat sem fasin we olgeta oli gat.’ (1 Kor. 9:22) Fasin ya we yu save jenisim ol tok blong yu oltaem blong mekem i stret long enikaen man we yu mitim, hem i olsem stamba rod blong kasem hat blong olgeta.
4 !Yumi glad tumas blong “talemaot gud nius” long ol man, se i gat wan gudfala taem i stap kam! (Aes. 52:7) Taswe i gud yumi ‘mekem ol samting from gud nius’ blong bambae yumi save kasem plante moa man.—1 Kor. 9:23.