Talemaot Gud Nius Long Plante Moa Man
1. ?Ol faswan Kristin oli mekem wanem, blong gud nius i save kasem plante moa man?
1 Ol faswan Kristin oli traehad bigwan blong mekem gud nius blong Kingdom i go long ol man. Oli tingbaot ol gudfala rod blong mekem se gud nius i kasem plante moa man. Ol Kristin we oli raetem Baebol oli yusum lanwis Grik, hemia lanwis blong olgeta kantri we Rom i rul long olgeta. Mo tu, ol man we oli gat strong tingting blong prij long ol yia wan handred mo tu handred K.T., maet oli ol faswan man blong yusum kaen buk ya we oli kolem kodeks, we i moa isi blong faenem ol vas long hem i bitim ol skrol.
2, 3. (a) ?Olsem wanem Aesea 60:16 i stap kamtru long taem blong yumi? (b) ?Olsem wanem ol man blong God oli stap yusum ol mesin blong mekem trufala wosip i gohed moa?
2 Yusum Mesin We Ol Man Oli Wokem: Tru long profet Aesea, Jeova i talemaot tok ya: “Ol man blong ol narafala kantri wetem ol king blong olgeta bambae oli lukaot gud long yufala, olsem wan mama we i stap lukaot gud long bebi blong hem, i stap givim titi long hem.” (Aes. 60:16) Profet tok ya i kamtru long taem blong yumi, taem ol man blong wok blong Jeova oli yusum ol sas samting blong ol kantri blong mekem trufala wosip i gohed. Olsem nao, long 1914, ol Baebol Studen oli stat blong soemaot “Photo-Drama of Creation” (Sinema Blong Ol Samting We God i Wokem). Hemia plante yia bifo we ol man oli wokem ol sinema we man i toktok mo i muvum bodi blong hem. Sinema ya “Photo-Drama of Creation”, we i tekem eit aoa blong soem, hem i ol foto mo ol pija we oli mufmuv, wetem kala mo saon tu. Hem i givim wan bigfala witnes long plante milian man.
3 Tede, ol man blong God oli yusum ol mesin we oli wok spid mo ol kompiuta blong printim ol Baebol mo ol buk we oli tokbaot Baebol, long plante handred lanwis. Oli yusum ol transpot we oli ron spid blong sanem ol buk ya i go long ol ples farawe, ale oli kasem ol man we oli stap long 235 aelan mo kantri. Jeova i yusum tabu spirit blong pusum ol man blong hem blong oli yusumgud ol mesin ya, nao plante moa man oli save kasem trutok blong Baebol i bitim ol taem bifo.
4. ?Wanem sam jenis we samfala oli bin mekem long laef blong olgeta, blong oli save kasem plante moa man wetem gud nius?
4 Mekem Sam Jenis Long Laef Blong Yumi: Ol trufala man blong God oli mekem sam jenis long laef blong olgeta, blong oli save kasem plante moa man wetem gud nius. Plante oli bin mekem se laef blong olgeta i no moa fasfas, nao oli save joen moa long wok blong prij. Samfala oli muv i go long ol ples we i nidim moa ol man blong prij. Sam narafala bakegen oli lanem wan narafala lanwis, blong oli save mekem moa long wok blong prij.
5, 6. ?Wanem samting we yumi save mekem long ples blong yumi blong kasem plante moa man?
5 Mo tu, yumi save kasem plante moa man wetem gud nius sipos yumi prij long taem we oli stap long haos blong olgeta, mo sipos yumi prij long ol ples we yumi save faenem plante man long hem. ?Olsem wanem? ?Sipos yu stap prij long dei be yu no faenem plante man long haos blong olgeta, yu save jenisim program blong yu smol, blong yu save prij long sapa? ?I gat sam pablik ples we yu save prij long olgeta? ?Yu yu traem finis blong yusum telefon blong prij, mo blong prij long ol stoa mo ofis? ?Yu yu lukaot ol janis blong prij?
6 !Yumi gat wan bigfala blesing blong joen long bigfala wok ya blong talemaot nem blong Jeova mo Kingdom blong hem! I gud yumi gohed nomo blong serem trutok blong Baebol we i save givim laef, wetem plante moa man.—Mat. 28:19, 20.