Yusum Isi Fasin Blong Tij
1. ?Wanem wan impoten samting we yumi mas gat blong yumi save tijim man long gudfala, klia fasin?
1 Isi fasin blong tij, hemia wan impoten samting we yumi mas gat blong yumi save tij gud. Sipos yumi traem lukluk gud long fasin blong Bigfala Tija, Jisas, samting ya i save halpem yumi blong kamgud moa long fasin blong “tijimgud” man.—2 Tim. 4:2; Jon 13:13.
2. ?Wanem samting we yumi mas mekem blong tijim man long isi fasin? ?Tijing olsem i gat paoa olsem wanem long man?
2 Yusum Ol Isi Tok: Long Bigfala Toktok blong Jisas antap long hil, hem i talemaot sam trutok we oli dip moa i bitim ol narafala tok we man i talem samtaem, be hem i yusum ol isi tok nomo blong talemaot. (Mat. japta 5-7) Ol man we oli lesin long ol tijing blong Jisas oli “sapraes tumas long tok blong hem.” Tok blong Jisas i gat paoa tu long ol soldia we oli kam blong holem hem, nao oli talem se: “!I no gat man we i save tok olsem man ya samtaem!” (Mat. 7:28, 29; Jon 7:46) Blong mekem se man i bilif fulwan long trutok, i no nid blong yumi yusum ol bigfala tok, ol strong tok, mo ol pijatok we oli fasfas mo i had blong kasem save long olgeta. Yumi save eksplenem trutok i klia nomo, sipos yumi yusum ol tok we yumi stap yusum long laef blong yumi evri dei.
3. ?From wanem samfala oli givim plante tumas save wantaem long man? ?Olsem wanem yumi save blokem fasin ya?
3 No Givim Plante Tumas Save Wantaem: Taem Jisas i skelem hamas save blong givim long ol man we hem i tijim, hem i tingbaot nid blong ol man ya. (Jon 16:12) Yumi mas luksave nid blong man tu mo givim save we i naf nomo long nid blong hem. Hemia i tru moa taem yumi stap prij long ol famle blong yumi, olgeta we oli jes stat blong save trutok, mo ol pikinini. Yumi mas lukaotgud se yumi no givim plante tumas save wantaem, nating we i luk olsem se oli stap lesingud. Olgeta we hat blong olgeta i stret bambae oli gohed nomo blong tekem save long saed blong trufala God, Jeova.—Jon 17:3; 1 Kor. 3:6.
4. ?From wanem i moagud blong tokbaot ol bigfala poen i bitim plante smosmol poen?
4 Tokbaot Ol Bigfala Poen: Jisas i no ademap plante smosmol poen we oli save mekem tijing blong hem i fasfas. Tingbaot taem ya we hem i talem se: “Ol dedman . . . bambae oli aot long beregraon blong olgeta.” Hem i luksave se i no stret long taem ya blong ademap plante save bakegen long saed blong wanem bambae i hapen long tufala grup ya we oli laef bakegen. (Jon 5:28, 29) Taem yumi mekem Baebol stadi long wan man, yumi mas tokbaot moa ol bigfala poen, mo yumi mas blokem fasin ya blong ademap ol narafala save we i no nid blong tokbaot.
5. ?Wanem blesing we yumi save kasem sipos yumi tijim man long isi fasin?
5 !Yumi talem tangkiu tumas long Jeova from we hem i tijim yumi long isi fasin long evri samting we yumi mas save long hem! (Mat. 11:25) I gud yumi traehad blong lanem blong tijim man long isi fasin, nao bambae yumi glad tumas taem wok blong yumi i karem frut.