Tri Rod Blong Tijim Gud Ol Man
1. ?From wanem yumi wantem tijim gud ol man?
1 Yumi, ol Witnes blong Jehova, yumi tijim ol man. Yumi prij long olgeta, yumi go luk olgeta bakegen, mo yumi mekem Baebol stadi long olgeta. Yumi wantem givim save long olgeta. Mo save ya i spesel, from we i kamaot long Tok blong God mo ‘i save sevem olgeta.’ (2 Tim. 3:15) !Hemia samting we i nambawan tumas! Naoia yumi tokbaot tri rod blong tijim gud ol man.
2. ?Yumi mekem wanem blong tijim gud man?
2 Ol Tok We i Isi: Taem yu wantem tijim man long wan samting long Baebol, yu mas tingbaot se yu yu save samting ya finis, taswe i isi long yu. Be man ya i no save, mo bambae i had long hem. Yu no mas givim tumas smosmol save we hem i no nidim. I moa gud yu mekem ol bigfala poen nomo oli kamaot klia. I no nid blong toktok tumas taem yu wantem tijim gud man. (Prov. 10:19) Klosap oltaem, i moagud blong ridim ol impoten vas nomo. Nao yu tokbaot haf blong vas ya we i stret long samting we yutufala i stadi long hem. Long Bigfala Toktok blong Jisas antap long hil, we i stap long Matiu japta 5 kasem japta 7, hem i eksplenem ol dip trutok. Be ol tok blong Jisas i isi nomo, mo hem i no toktok tumas.
3. ?Ol pijatok oli mekem wanem long man? ?Wanem kaen pijatok i moa gud?
3 Ol Pijatok: Ol pijatok oli pulum tingting, oli tajem hat, mo oli mekem se man i no fogetem wanem we hem i lanem. Yu no mas ting se: “Mi mi no wan gudfala man blong storian. Mi no save yusum ol pijatok.” Plante pijatok blong Jisas oli isi mo oli sot nomo. (Mat. 7:3-5; 18:2-4) Ol pija tu we yu droem long pepa, oli save tijim gud man. Sipos yu tingting gud fastaem, yu save faenem ol gudfala pijatok.
4. Taem yumi yusum kwestin blong tijim man, ?yumi mas mekem olsem wanem?
4 Ol Kwestin: Ol kwestin oli mekem man i tingting. Taswe taem yu askem wan kwestin, yu mas wet smoltaem. Sipos yu hareap blong ansa, bambae yu no save se man i kasem save no nogat. Sipos hem i givim rong ansa, yu askem sam moa kwestin we oli save lidim hem i go long stret ansa. Hemia i moagud i bitim we yu talem nomo wanem ansa i stret. (Mat. 17:24-27) I tru, i no gat wan tija we i stret gud olgeta. Taswe, Baebol i talem se yumi mas lukaot gud long ol tok we yumi tijim man long hem. Sipos yumi mekem olsem, bambae yumi sevem yumi mo olgeta we oli lesin long yumi.—1 Tim. 4:16.