?Bambae Yu Yu Statem Wan Baebol Stadi Long Manis Oktoba?
1. ?Bambae yumi seremaot wanem buk long manis Oktoba?
1 Long manis Oktoba, bambae yumi seremaot Wajtaoa mo Wekap! I gud yumi givim traket ya ?Yu Yu Wantem Save Trutok? mo traem statem wan Baebol stadi, taem yumi gobak bakegen long man we i intres. ?Olsem wanem blong mekem samting ya taem yumi gobak luk man we i intres?
2. Taem yumi gobak luk man we i karem ol magasin, ?olsem wanem yumi save yusum traket ya ?Yu Yu Wantem Save Trutok?, blong statem wan Baebol stadi?
2 Olsem Wanem Blong Yusum Traket Ya: Yumi save talem se: “Ol magasin ya we mi givim long yu oli pulum tingting blong ol man blong oli stadi Baebol, nomata se oli blong wanem ples mo wanem jos. [Yumi save givim traket ya ?Yu Yu Wantem Save Trutok? long man blong haos, mo soem ol kwestin we oli stap long faswan pej.] Hemia sam kwestin we i pulum intres blong ol man mo Baebol i givim ol stret ansa long olgeta. ?Samtaem yu yu askem sam kwestin olsem?” Taem man blong haos i ansa finis, yumi save tokbaot ansa blong kwestin ya we hem i jusum, we i stap long traket, mo ridim ol vas we oli raetem finis i stap. Biaen yumi save talem long hem se samting we yumi storian long hem, i wan long ol samting we Baebol i tijim, ale, yumi save givim buk ya Baebol Tijim long hem. Afta, yumi save tokbaot ol faswan haf long wan japta we man blong haos i jusum long lis blong ol japta. Sipos no, yumi save go stret long ol paragraf blong buk we i gat moa save long saed blong samting we yumi stap tokbaot long traket. Hemia sam long ol pej mo paragraf we yumi save yusum:
● ?God i rili kea long yumi? (pej 9-11, haf 6-10)
● ?Faet mo fasin safa bambae i finis samtaem? (pej 12, haf 12-13)
● ?Wanem i hapen long yumi taem yumi ded? (pej 59-60, haf 7-8)
● ?Ol dedman bambae oli laef bakegen samtaem? (pej 71, haf 13-15)
● ?Olsem wanem mi save prea blong God i harem mi? (pej 166-167, haf 5-8)
● ?Olsem wanem mi save glad long laef? (pej 9, haf 4-5)
3. ?Yumi save mekem wanem sipos yumi luk se i no stret yet blong statem Baebol Stadi?
3 Be sipos long faswan taem we yumi gobak luk man we i intres, nao yumi luk se i no stret yet blong statem Baebol stadi long buk ya Baebol Tijim, oltaem yumi mas mekem rod blong gobak luk hem bakegen mo gohed long storian blong yumi. Maet yumi gobak luk man plante taem blong storian long tu no tri kwestin we oli stap long traket ya. Biaen nomo, yumi givim buk ya long hem. I gud yumi yusum gud traket ya long manis Oktoba blong statem wan Baebol stadi mo halpem ol man we hat blong olgeta i stret blong oli “save trutok.”—Jon 8:31, 32.