?Yumi Tokbaot Wanem Long Ol Magasin?

Wajtaoa Oktoba 1

“Mi mi save se yu stap tingbaot laef blong yu se bambae i olsem wanem long fiuja. Long Prea blong Masta, Jisas i tijim yumi blong askem long God blong mekem ol samting we hem i wantem, oli kamaot long wol olsem we oli kamaot finis long heven. ?Long tingting blong yu, bambae wol ya i olsem wanem long taem ya? [Yu save letem man i ansa.] Hemia nao wan pija blong paradaes we wan man i droem. [Yu save soem pija we i stap long pej 8 mo 9. Biaen yu ridim Ol Sam 72:12-14, we i stap long pej 6.] ?Yu ting se bambae yu harem gud blong stap long wan naesfala wol olsem? Wajtaoa ya bambae i soemaot long yu, olsem wanem yu mo famle blong yu, yufala i save laef long wan paradaes olsemia.”

Wekap! Oktoba-Disemba

“Maet ol Witnes blong Jeova oli storian wetem yu finis. ?Yu yu stap tingbaot from wanem mifala i stap go long ol haos wanwan, speseli taem bighaf blong ol man oli no wantem lesin? [Yu save letem man i ansa. Biaen yu save ridim Matiu 24:14.] Mifala i faenemaot se plante man oli gat rong tingting long saed blong ol Witnes. Wekap! ya i eksplenem hu ya ol Witnes blong Jeova, wanem bilif blong olgeta, mo wok we oli stap mekem.”

Wajtaoa Novemba 1

“Ol man blong ol defdefren skul we oli stap olbaot long wol oli stap prea. ?Long tingting blong yu, God i harem prea blong olgeta, mo hem i ansa long ol prea ya? [Yu save letem man i ansa.] Baebol i pulum yumi blong prea oltaem. [Yu save ridim Filipae 4:6, 7.] Wajtaoa ya i givim ansa long seven kwestin we plante man oli askem long saed blong prea.”

Wekap! Oktoba-Disemba

“Sam man oli ting se God i no wan man, be i wan paoa nomo. Sam narafala oli ting se hem i olsem wan man we i no kea. ?Wanem tingting blong yu? [Yu save letem man i ansa.] Yu traem luk vas ya we i pulum tingting blong yumi. [Yu ridim 1 Pita 5:6, 7.] Haf blong Wekap! ya we i stat long pej 29, i talem ansa we Baebol i givim long kwestin ya se, ?God i wan paoa nomo?”