?Yumi Tokbaot Wanem Long Ol Magasin?

Wajtaoa Februari 1

“?Yu yu tingbaot from wanem Setan i yusum wan snek, blong i giaman long Iv? [Yu letem man i ansa.] Mi mi gat wan samting blong soemaot long yu, we i save pulum tingting blong yu.” Yu save tokbaot pej 23 blong Wajtaoa ya, mo yu save soem wan long ol vas blong Baebol we oli stap. Yu givim magasin ya long hem, mo yu mekem plan blong kam luk hem bakegen blong tokbaot olsem wanem ol save ya oli givhan long yumi tede.

Wekap! Jenuware-Maj

“From we Baebol i wan buk we i olfala tumas, sam man oli ting se hem i no stret mo yumi no save trastem. ?Wanem tingting blong yu? [Yu letem man i ansa, mo yu save ridim Aesea 40:8.] Ol save long pej 27 blong Wekap! ya i soemaot se, Baebol i kamaot long God mo yumi save trastem.”

Wajtaoa Maj 1

“Tede, plante man oli divos. ?Yu ting se wanem nao i stamba blong trabol ya? [Yu letem man i ansa.] Yu traem luk advaes ya we i givhan long plante man mo woman we oli mared. [Yu ridim 1 Korin 10:24.] Magasin ya i tokbaot sikis komplen blong ol hasban mo waef, mo i soemaot olsem wanem ol rul blong Baebol oli save givhan long olgeta, sipos oli folem long laef blong olgeta.”

Wekap! Jenuware-Maj

“?Yu yu ting se ol disasta oli wok blong God? [Yu letem man i ansa. Biaen yu ridim Jenesis 18:25.] Magasin ya i soemaot olsem wanem sam man Haiti oli winim ol bigfala trabol blong wan etkwek long Jenuware long yia ya.” Yu save soemaot haf we i stap long pej 14.