?Yumi Tokbaot Wanem Long Ol Magasin?

Wajtaoa Maj 1

“?Yu yu ting se yumi naf blong save se God i olsem wanem? [Yu letem man i ansa.] Mi mi gat wan gudfala samting blong soemaot long yu.” Yu save ridim mo tokbaot save we i stap long kwestin 2 long pej 10, mo yu save ridim wan long ol vas we oli stap. Yu givim magasin ya long man, mo yu mekem plan blong kambak blong tokbaot save we i stap long kwestin 3.

Wekap! Jenuware-Maj

“Taem graon i seksek, plante tumas man oli ded, mo i spolem plante samting tu. Plante man we oli no ded oli lusum hom blong olgeta, mo oli no moa gat mane blong wokem bakegen. Ol etkwek oli joen wetem wan profet tok blong Baebol we i impoten tumas.” Yu save ridim Luk 21:11, mo yu soem pej 20 blong Wekap! ya.

Wajtaoa Eprel 1

“Ol man oli gat defdefren tingting long saed blong Jisas. ?Yu yu tingbaot Jisas olsem pikinini blong God, no yu ting se hem i jes wan gudfala man?” Yu letem man i ansa. Biaen, yutufala i ridim ol save we i stap long wan long ol kwestin we oli raetem long blak kala, long pej 10 mo 11, mo yutufala i ridim wan long ol vas we oli stap. Yu givim magasin ya long man, mo yu mekem plan blong kambak blong tokbaot ansa blong kwestin we i kam biaen.

Wekap! Eprel-Jun

“I luk olsem se naoia, plante moa man oli wantem save long spirit blong ol dedman we ol man oli talem se oli kam dring blad blong ol man long naet, mo oli wantem save tu long wok blong kleva, mo long ol bisnes blong masing mo posen. ?Yu yu ting se i oraet nomo sipos man i wok wetem ol rabis spirit? [Yu letem man i ansa.] Yu traem luk woning ya we God i givim long ol man Isrel bifo. [Yu save ridim Dutronome 18:10-12.] Magasin ya i tokbaot wanem we Baebol i talem long saed blong wok blong ol rabis spirit.”