‘God, Yu Mekem Nem Blong Yu i Tabu’
1. ?Wanem stamba tok blong seket asembli blong 2012? ?Stamba tok ya i stanap long wanem?
1 !Yumi gat bigfala blesing blong karem nem blong Jehova, we i Hae King blong heven mo wol! God nao i putum nem blong hem long yumi. Mo stat long yia 1931, ol man oli luksave yumi ol Witnes blong Jehova, from tabu nem ya blong God. (Aes. 43:10) Jisas we i stret Pikinini blong God, i tinghae long nem blong God. Taem hem i tijim ol man blong hem long Lodsprea, hem i tokbaot nem ya fastaem long ol narafala samting. (Mat. 6:9) Taswe, stamba tok blong seket asembli blong 2012, i stanap long ol tok ya blong Jisas. Stamba tok ya se, ‘God, Yu Mekem Nem Blong Yu i Tabu.’
2. ?Wanem ol tok we bambae yumi glad blong lesin long olgeta?
2 Ol Tok We Bambae Yumi Lesin Long Olgeta: Long Sarede, bambae yumi lesin long tok ya “Ol Paenia Oli Mekem Ol Man Oli Save Long Nem Blong God.” Tok ya bambae i eksplenem from wanem wok blong paenia i save karem glad long laef blong man. Bambae yumi lesin tu long wan tok we i gat fo haf blong hem, we nem blong hem, “Yumi Mas Lukaot Se Yumi No Sakem Doti Long Nem Blong Jehova.” Tok ya bambae i givhan long yumi, blong yumi no foldaon long fo samting, we oli olsem ol trap. Narafala tok ya, “?From Wanem Yumi Mas Mekem Nem Blong God i Tabu?” bambae i ansa long tufala kwestin ya: ?Wanem bambae i givhan long yumi blong prij wetem strong tingting, nating se ol man oli no wantem lesin? ?Wanem bambae i givhan long yumi blong karem frut long wok blong prij? Long Sande, bambae yumi harem gud long wan tok we i gat fo haf blong hem. Tok ya bambae i soemaot olsem wanem ol tingting blong yumi, ol tok blong yumi, ol desisen we yumi mekem, mo ol fasin blong yumi, oli save mekem nem blong God i tabu. Ol niuwan bambae oli glad blong harem pablik tok ya, “Jehova Bambae i Mekem Nem Blong Hem i Tabu Long Amagedon.”
3. ?Yumi gat wanem blesing? ?Asembli ya bambae i givhan long yumi olsem wanem?
3 Klosap nao Jehova bambae i tekem aksen blong mekem nem blong hem i tabu. (Esik. 36:23) Gogo kasem taem ya, yumi gat bigfala blesing ya blong leftemap tabu nem blong Jehova, mo blong mekem ol samting we oli joen wetem nem ya. Yumi gat strong tingting se seket asembli ya bambae i givhan long yumi wanwan, blong yumi mekem gud wok blong yumi, olsem ol man we oli karem nem blong God.