Ansa Long Wan Kwestin
◼ ?Hu i mas fulumap smol bokis long ol buk blong yumi mo long Intenet, blong askem wan buk no wan Baebol stadi?
Long ol buk blong yumi, plante taem i gat wan smol bokis we man i save raetem nem mo adres blong hem long hem, mo sanem i go long branj ofis. Smol bokis ya i blong askem wan buk no wan Baebol stadi. Mo tu, ol man oli save go long Web saet blong yumi, www.watchtower.org blong askem wan Baebol stadi. Ol rod ya oli givhan long plante man blong oli kasem trutok. Be problem i kamaot taem ol pablisa oli yusum ol rod ya blong askem sam buk, mo blong askem Baebol stadi blong ol famle mo ol fren blong olgeta.
Samfala oli komplen taem branj ofis i sanem wan buk long olgeta we oli no askem nating. Oli talem se ogenaesesen blong yumi i fosem olgeta tumas. Mo oli ting se yumi holem nem blong olgeta long wan lis blong ol man we yumi stap sanem buk long olgeta. Ol pablisa tu oli save sem taem oli mas go luk wan man we i no askem blong wan i go visitim hem, nao man ya i tok kros long olgeta. From samting ya, ol man we oli wantem save moa long ol buk blong yumi, olgeta nomo oli mas raetem nem mo adres blong olgeta long smol bokis ya no long Web saet blong yumi, be i no ol pablisa. Taem branj ofis i faenemaot se wan pablisa i raetem nem mo adres blong narafala man long smol bokis ya, plante taem oli no sanem wan pablisa blong i go luk man ya.
Ale, ?yumi save mekem olsem wanem blong givhan long wan famle no wan fren blong i kasem trutok? Sipos yu wantem se hem i kasem wan buk, maet i gud yu nomo yu sanem i go long hem olsem wan presen. Maet hem i talem se hem i wantem save moa, mo i wantem se ol Witnes oli go luk hem, be yu yu no save wan rod blong toktok wetem ol elda blong kongregesen long ples blong hem. Long taem olsem, yu mas fulumap smol pepa ya Please Follow Up (S-43) mo givim long sekretari blong kongregesen blong yu. Hem bambae i jekem pepa ya mo i sanem i go long branj ofis. Be sipos man ya we i wantem save moa i stap long kalabus, long hospital, no long wan narafala ples olsem, yu no mas askem long branj ofis blong i sanem wan pablisa i go luk hem. Be yu save talem long hem blong i toktok long ol brata taem oli go prij long ol ples ya, no blong hem wan i raet i go long branj ofis.