Yu Mas Givhan Long Man Kwiktaem

Stat long taem ya we niufala Websaet blong yumi i kamaot, namba blong ol man we oli go long Intenet blong askem stadi, i kam antap bigwan. Mo samfala oli askem stadi from niufala rod ya blong prij long pablik ples. Branj ofis bambae i meksua se yumi givhan kwiktaem long ol man olsem. Wan eksampol. Sipos wan man i go long jw.org mo i askem wan Baebol stadi, branj ofis bambae i sanem adres blong hem i go kwiktaem long ol elda blong kongregesen we i lukaot long teritori we man ya i stap long hem. Sam ripot blong prij oli soemaot se sam man oli askem blong stadi, be ol pablisa oli tekem longtaem blong go luk olgeta. ?Be olsem wanem yumi save givhan kwiktaem long man blong i no lusum intres?—Mak 4:14, 15.

Sipos man ya i no stap long teritori blong yu, i gud yu fulumap pepa ya Please Follow Up (S-43) kwiktaem, mo yu givim long sekretari blong kongregesen, bifo long dei blong miting. Ale long wan no tu dei, sekretari i mas sanem adres ya i go long narafala kongregesen we i lukaot long teritori we man ya i stap long hem. Sipos no, hem i save go putum adres ya long jw.org blong branj ofis i luk, be sipos i no gat Intenet, hem i mas sanem long postofis. Ol elda oli mas jekem Websaet ya oltaem. Sipos oli kasem adres blong wan man, oli mas go luk man ya kwiktaem. Mo sipos wan pablisa i kasem adres blong wan man, i impoten we hem i go visitim man ya kwiktaem. Sipos yu go long haos blong man ya be hem i no stap, yu save raetem wan smol mesej mo telefon namba blong yu mo yu lego long haos blong hem.