Yumi Givhan Long Ol Man Blong Oli Lesin Long God
1. ?Wanem tufala buklet we yumi kasem long asembli ya, “!Kingdom Blong God i Kam!”? ?Mo from wanem tufala buklet ya i gud?
1 Long Asembli Blong Tri Dei, “!Kingdom Blong God Bambae i Kam!”, yumi kasem tu niufala buklet. Wan hemia Yu Mas Lesin Long God Nao Bambae Yu Laef Olwe mo narawan we i isi moa, hemia Listen to God, long Franis mo Inglis. From we i no gat plante toktok long tufala buklet ya, i isi blong tanem i go long narafala lanwis. Taem buklet ya, Yu Mas Lesin Long God Nao Bambae Yu Laef Olwe i kamaot long Inglis, hem i kamaot tu long 431 lanwis.
2. ?Tufala buklet ya bambae i givhan long hu?
2 ?Tufala buklet ya bambae i givhan long hu? Hemia sam samting we i hapen plante taem long olgeta ples long wol:
• Wan brata no sista i storian wetem wan man, maet long wok blong prij no taem hem i mekem wan visit, ale hem i faenemaot se man ya i no save rid, no i no rid gud.
• Wan brata no sista i storian wetem wan man we i toktok wan lanwis we yumi no gat ol buk we i stap long lanwis blong hem. No hem i faenem plante man we oli save toktok wan lanwis be oli no save ridim lanwis ya.
• Wan brata no sista i yusum saen lanwis blong storian wetem ol man we sora blong olgeta i fas.
• Wan papa mo mama i wantem tijim trutok long smol pikinini blong tufala we i no save rid yet.
3. ?Wanem samting i stap long buklet ya, Listen to God?
3 Samting We i Stap Long Tufala Buklet Ya: Long buklet ya Listen to God i gat sotfala toktok nomo, toktok blong hem i isi, mo i gat vas blong Baebol long en blong pej daon, we oli soemaot ol bigfala poen. ?From wanem i olsem? Yu traem tingbaot se wan man i givim wan buk long yu long wan lanwis we yu no save ridim, mo maet yu no save raeting blong hem. ?Olsem wanem? ?Bambae yu yu glad blong ridim, nating se i gat ol naesfala pija long hem? Ating nogat. Long sem fasin, ol man we oli no save rid, bambae oli no glad blong ridim ol buk we i gat tumas toktok long hem. Taswe, taem man i lukluk wan pej blong buklet ya, samting we i pulum ae blong hem, hemia ol pija wetem ol ara we i pulum olgeta i go long nekis pija.
4. ?Wanem samting i stap long buklet ya, Yu Mas Lesin Long God Nao Bambae Yu Laef Olwe?
4 Ol pija long tufala buklet ya oli sem mak. Buklet ya Yu Mas Lesin Long God Nao Bambae Yu Laef Olwe, hem i blong givhan long ol man we oli no save ridgud no we oli stap lanem blong rid. Man we i mekem stadi, i save yusum buklet ya taem hem i stadi wetem man we i gat buklet ya Listen to God. Antap long pej long lefsaed, i gat kwestin we yu save faenem ansa blong hem long tufala pej. Mo i gat ol pija mo ol smol toktok we i joen wetem olgeta, mo i gat ol vas blong Baebol tu. Daon long ol kona blong sam pej, yu save luk wan smol bokis. Long bokis ya, i gat sam moa save mo vas blong Baebol, we yu save tokbaot wetem studen blong yu, sipos i stret long hem.
5. ?Wetaem mo olsem wanem blong seremaot tufala buklet ya?
5 Olsem Wanem Blong Yusum Tufala Buklet Ya: Sipos yu luk se i stret, yu save givimaot wan long tufala buklet ya long man we yu prij long hem, nating se i no buk we yumi stap seremaot long manis ya. (Yu lukluk bokis ya “Rod Blong Seremaot Tufala Buklet Ya.”) Yu save givim buklet ya long man we yu visitim. Yu save talem long hem se yu gat wan samting blong givim long hem, ale yu givim buklet ya long hem.
6. ?Olsem wanem blong yusum tufala buklet ya blong mekem stadi wetem man?
6 Long buklet Listen to God, i no gat ol kwestin. Taswe, fasin blong mekem stadi long hem, i defren long fasin we yumi folem taem yumi mekem stadi long buk ya Baebol Tijim. Long plante ples, ol man oli laekem blong harem ol stori. Yu save yusum ol pija blong tokbaot ol stori we oli stap long Baebol. Yu eksplenem wanem we ol pija ya oli soemaot. Yu mas toktok wetem glad. Yu askem tingting blong studen. Yu ridim ol vas we oli stap daon long pej, mo yu pulum hem blong tingbaot samting we vas i talem. Yu askem kwestin we i pulum hem blong talemaot tingting blong hem, mo blong luk sipos hem i kasem save wanem we yutufala i stap tokbaot. Sipos hem i yusum buklet ya Yu Mas Lesin Long God Nao Bambae Yu Laef Olwe, yutufala i save ridim ol smol tok mo ol vas we oli joen long ol pija.
7. ?Yu save mekem wanem blong givhan long studen blong i gohed gud?
7 Yu Givhan Long Studen Blong i Gohed Gud: Taem yu mekem stadi long ol buklet ya, maet samting ya bambae i pulum hem blong i wantem rid, blong i save moa Jehova. (Mat. 5:3; Jon 17:3) Taswe, sipos yu yusum buklet ya Listen to God, sloslo yu save askem studen sipos yu save tijim hem blong rid. Ale, yu save yusum narafala buklet ya, Yu Mas Lesin Long God Nao Bambae Yu Laef Olwe. Yu mas tingbaot se taem studen i finisim stadi long tufala buklet ya, hem i no rere yet blong baptaes. Yu mas yusum buk ya Baebol Tijim no wan narafala buk blong stadi, blong givhan long hem blong i kasem save moa long ol trutok blong Baebol.
8. ?From wanem yumi glad long tufala buklet ya we yumi save yusum long wok blong prij?
8 Ol man oli mas lesin long Hae Rula blong heven mo wol, sipos oli wantem laef olwe. (Aes. 55:3) Mo Jehova i wantem se “olgeta man,” wetem olgeta tu we oli no save rid, oli lanem blong lesin long hem. (1 Tim. 2:3, 4) !Yumi glad tumas we yumi save yusum tufala buklet ya blong tijim ol man blong oli lesin long God!
[Bokis blong pija long pej 3]
Rod Blong Seremaot Tufala Buklet Ya
Yu tanem buklet i go long pej 2-3, mo yu askem long man se: “?Yu yu wantem laef long wan ples olsem? [Yu letem man i ansa.] Baebol i promes se i no longtaem, God bambae i mekem wol ya i kam wan naesfala ples we bambae i no moa gat man i pua, mo i sik. Yu traem luk samting we yumi mas mekem blong yumi save stap long naesfala ples ya. [Yu ridim Aesea 55:3, we i stap antap long pej 3.] Vas ya i talem se yumi mas ‘kam’ long God mo yumi ‘lesin’ long hem. ?Be yumi mekem olsem wanem blong lesin long God?” Yu tanem i go long pej 4-5, mo yu tokbaot ansa wetem hem. Sipos hem i bisi, yu givim buklet long hem mo yu mekem plan blong kambak mo tokbaot buklet ya wetem hem.