Ol Fastok

Blong Statem Ol Baebol Stadi Long Fas Sarede Blong Manis Oktoba

“Plante man oli bilif se wan dei bambae God i jajem olgeta from ol samting we oli mekem. ?Yu yu ting se Jajmen Dei i wan taem blong glad no wan taem blong fraet? [Letem man i ansa.] Magasin ya i tokbaot ansa blong kwestin ya.” Yu givim Wajtaoa blong namba 1 Oktoba long hem, mo yu tokbaot ol save we i stap long fas kwestin long pej 16. Yu save ridim wan long ol vas we i stap. Yu mekem plan blong kambak bakegen blong tokbaot nekis kwestin.

Wajtaoa 1 Oktoba

“Long plante ples long wol tede, ol woman oli harem nogud tumas. Ol man oli daonem ol woman, oli kilim olgeta, mo oli mekem i nogud long olgeta. Sore tumas, samtaem ol bilif mo kastom oli tijim man blong tingting nogud long woman. ?Yu yu ting se God i kea long ol woman? [Letem man i ansa.] Bambae yumitu ridim wan vas blong Baebol we i talem long ol man se oli mas mekem wanem fasin long woman blong olgeta. [Ridim Efesas 5:28, 29.] Wajtaoa ya i tokbaot tingting we God i gat long ol woman.”

Wekap! Oktoba-Disemba

“Plante man oli talem se, wan dei, bambae wol i lus. Samfala oli talem se ol bigfala bom we man i wokem bambae oli bosta, no weta we i stap jenis bambae i mekem wol i kam hot moa gogo i no moa gat laef. ?Yu ting se ol stori ya oli tru? [Letem man i ansa.] Baebol i talem wan promes we i mekem yumi harem gud tumas. [Ridim Ol Sam 37:29.] Wekap! ya i tokbaot ol defdefren stori we ol man oli stap talem, wetem samting we Baebol tu i talem long saed blong fiuja. Bambae yu luk se ol samting we Baebol i talem oli stret.”