Yumi Mas Yusum Gud Ol Olfala Magasin
Sipos yumi putum gud ol olfala magasin nomo long haos, no yumi sakem olgeta, oli no save givhan long man. Taswe i gud yumi traehad blong seremaot olgeta. Wan magasin nomo i save pulum man blong i laekem trutok, mo i singaot long nem ya Jehova. (Rom 10:13, 14) Naoia bambae yumi tokbaot sam rod we yumi save folem blong yusum gud ol olfala magasin.
Sipos yumi prij long ol teritori we yumi no stap go long olgeta oltaem, nao yumi go long wan haos we man i no stap, yumi save lego wan olfala magasin.
Taem yumi prij long ol pablik ples, olsem long epot no long wof, yumi save askem long ol man sipos oli glad blong ridim wan magasin. Sipos oli glad, yumi save soemaot ol olfala magasin long olgeta, mo yumi askem long olgeta blong oli jusum wan.
Taem yumi go blong luk dokta, no yumi go long ol ofis no sam narafala ples olsem, long teritori blong kongregesen blong yumi, we i gat ples we man i save wet long hem, i gud yumi putum sam olfala magasin. Oltaem i gud blong askem fastaem long man we i lukaot long ples ya. Sipos yumi luk se i gat sam magasin blong yumi i stap finis, i moa gud yumi no putum.
Taem yumi mekemrere from wan visit, i gud yumi tingbaot se man no woman ya ?i gat pikinini? ?Hem i laekem blong go long ol narafala kantri? ?Hem i laekem wok long garen? Afta i gud yumi lukluk bakegen long ol olfala magasin sipos i gat wan haf we bambae hem i glad blong ridim. Nao taem yumi go luk hem yumi save givim long hem.
Sipos yumi gat wan visit we yumi gobak bakegen mo bakegen be hem i neva stap, taem yumi faenem hem bakegen, i gud yumi givim ol olfala magasin long hem.