Yu Mas Lanem Blong Kam Long Stret Taem
1. ?Jehova i soemaot wanem gudfala eksampol?
1 Jehova i neva let. Hem i ‘givhan long ol man blong hem, stret long taem we oli trabol.’ (Hib. 4:16) Mo hem i givim “kakae long olgeta long stret taem blong hem.” (Mat. 24:45) Taswe yumi save trastem se dei blong kros blong hem bambae i “kamtru long stret taem blong hem.” (Hab. 2:3) !Yumi kasem plante blesing from we Jehova i mekem ol samting long stret taem blong olgeta! (Sam 70:5) Be yumi, yumi no stret gud olgeta mo yumi bisi oltaem. Taswe samtaem i had blong yumi mekem samting long stret taem. ?From wanem yumi mas lanem blong kam long stret taem?
2. ?From wanem fasin blong mekem samting long stret taem i leftemap nem blong Jehova?
2 Long ol las dei ya, plante man oli no moa wantem mekem samting long stret taem, from we oli tingbaot olgeta nomo mo oli no bos long tingting blong olgeta. (2 Tim. 3:1-3) Taswe, taem ol narafala oli luk we ol Kristin oli stat wok long stret taem, oli go luk ol man long stret taem we oli promes blong go, mo oli go long miting long stret taem, samting ya i leftemap nem blong Jehova. (1 Pita 2:12) ?Olsem wanem? ?Yu yu luk se taem yu wok blong wan masta, yu stat long stret taem, be taem yu kam long miting, plante taem yu kam let? I gud blong tingbaot se taem yumi stap long miting long stret taem, blong yumi joen long singsing mo prea, yumi soemaot se yumi wantem folem fasin blong Papa blong yumi long heven.—1 Kor. 14:33, 40.
3. ?From wanem taem yumi kam long stret taem, yumi soemaot se yumi tingbaot ol narafala?
3 Taem yumi no let, yumi soemaot tu se yumi tingbaot ol narafala. (Fil. 2:3, 4) Sipos yumi kam long miting mo long miting blong prij long stret taem, yumi no spolem ol narafala Kristin we oli stap lesin. Be sipos yumi stap kam let oltaem, yumi givim tingting se yumi tingbaot moa prapa taem blong yumi i bitim taem blong ol narafala. Ol narafala oli laekem man we i kam oltaem long stret taem, from we oli save trastem hem, oli save dipen long hem, mo oli save se hem i wan man blong wok.
4. Sipos yu stap let oltaem, ?yu save mekem wanem blong yu jenis?
4 Sipos yu stap let oltaem, i gud yu tingting plante blong faenem se from wanem i olsem. Yu mekem wan gudfala program we bambae i givhan long yu, blong yu mekem ol wok long stret taem blong olgeta. (Pri. 3:1; Fil. 1:10) Yu askem long Jehova blong i givhan long yu. (1 Jon 5:14) Taem yu kam long stret taem, yu soemaot se yu tinghae long tufala loa we i hae moa long ol narafala loa, hemia blong yu lavem God mo ol man raonabaot long yu.—Mat. 22:37-39.