Strong Tingting Blong Pulum Man i Kam Disaepol
1. ?Yumi mas mekem wanem blong givhan long ol man blong oli kasem laef?
1 Ripot blong prij long yia 2014 i soemaot se yumi gat strong tingting mo yumi wok strong blong talemaot gud nius blong Kingdom. (Mat. 24:14) Yumi stap prij long ol haos wanwan, yumi mekem spesel wok blong givimaot ol traket mo blong singaot man i kam long ol spesel miting, mo yumi prij long pablik ples. Long ol rod ya, yumi stap talemaot Kingdom long plante moa man. Be sipos oli wantem kasem laef, oli mas kam disaepol blong Jisas. Taswe, yumi mas stadi Baebol wetem olgeta.—1 Tim. 2:4.
2. ?Wanem ol kwestin we yumi mas tingbaot, blong yumi rere oltaem blong statem Baebol stadi?
2 Rere Oltaem Blong Statem Baebol Stadi: Taem yu faenem wan man we i intres, ?yu yu raetemdaon nem mo adres blong hem, mo yu gobak kwiktaem blong traem statem Baebol stadi? Taem yu prij long wan man, ?yu yu soemaot long hem olsem wanem yumi mekem Baebol stadi? ?Yu yu stap askem long ol rod magasin blong yu sipos oli wantem stadi? Mo tu, i gat tufala video ya ?From Wanem Yu Mas Stadi Baebol? mo ?Oli Mekem Baebol Stadi Olsem Wanem? ?Yu yu soem tufala video ya long ol man we yu wok wetem olgeta, ol yangfala long skul, ol man we oli stap raonabaot long yu, ol famle blong yu, mo ol narafala fren? Taem yu yusum kat blong prij long pablik ples, ?yu yu talem long ol man we oli karem buk se oli save gat wan fri Baebol stadi?
3. ?Yumi mas mekem wanem blong tijim ol man?
3 Bambae Jehova Mo Jisas i Givhan Long Yu: Taem Jisas i talem se yumi mas ‘pulum ol man oli kam man blong hem,’ hem i talem fastaem se “yufala i mas go.” Hemia i soemaot se yumi mas tekem aksen mo traehad. Bambae hem i no lego yumi, from we hem i promes se bambae hem i stap wetem yumi. (Mat. 28:19, 20) Mo tu, Jehova i givim tabu spirit long yumi, mo i givim ol tul mo trening we yumi nidim blong tijim ol man long trutok. (Sek. 4:6; 2 Kor. 4:7) Yumi save prea long Jehova, blong hem i mekem we yumi “glad blong obei long hem,” mo blong hem i ‘givim paoa long yumi’ blong mekem impoten wok ya.—Fil. 2:13.
4. ?From wanem yumi mas gat strong tingting blong pulum man i kam disaepol?
4 Taem yumi talemaot gud nius, yumi glad. Be yumi glad moa taem yumi tijim man long trutok, nao hem i joen wetem yumi blong wokbaot long ‘rod we i go kasem laef.’ (Mat. 7:14; 1 Tes. 2:19, 20) Samting we i impoten moa, se Jehova i glad long yumi taem yumi gat strong tingting blong pulum ol man oli kam disaepol. “Hem i no wantem se bambae wan man i lus. Hem i wantem blong olgeta man bambae oli tanem tingting blong olgeta from ol sin blong olgeta.”—2 Pita 3:9.