Yu Mas Rere Oltaem Blong Statem Wan Baebol Stadi
1. ?Yumi mas mekem wanem blong finisim wok ya we Jisas i givim long yumi long Matiu 28:19, 20?
1 Jisas i givim wan wok long yumi, hemia blong ‘pulum ol man oli kam man blong Kraes, mo tijim olgeta.’ (Mat. 28:19, 20) Taswe evri taem we yumi prij, yumi mas rere blong statem Baebol stadi wetem ol man. Yumi no mas wet long wiken ya nomo we kongregesen i jusum blong statem ol Baebol stadi. Ol haf we oli kam biaen oli save givhan long yumi.
2. ?Hu ol man we yumi save askem long olgeta sipos oli wantem stadi Baebol?
2 Askem Long Ol Man Blong Oli Stadi Baebol: Sipos oltaem yumi askem long man blong stadi Baebol, bambae yumi gat moa janis blong kasem wan Baebol stadi. (Pri. 11:6) ?Yu yu traem finis blong askem stret long man? Wan kongregesen long Yunaeted Stet i traehad bigwan blong wan ful manis, blong askem stret long ol man sipos oli glad blong stadi Baebol. !Oli glad bigwan taem oli statem 42 niu Baebol stadi! Yu no mas ting se ol man we oli intres, oli save finis se yu yu glad blong stadi Baebol wetem olgeta. Taswe taem yu gobak bakegen blong luk olgeta, i gud yu askem sipos oli glad blong stadi Baebol. Sipos oli no wantem stadi, hemia i oraet nomo. Yu save gohed blong mekem intres blong ol man ya i gru. ?Yu yu askem finis long ol man we oli laef klosap long yu, ol famle, ol fren long wok, mo long skul, sipos oli glad blong stadi Baebol? Mo tu, yu save askem long olgeta we yu stap mekem Baebol stadi long olgeta, sipos oli gat sam fren no famle we oli laekem blong stadi Baebol.
3. ?Yumi gat wanem tul we i save givhan long yumi blong statem stadi, mo wetaem yumi save yusum tul ya?
3 Wan Nambawan Tul Blong Givhan: Wan nambawan tul blong statem Baebol stadi hemia traket ya, ?Yu Yu Wantem Save Trutok? Yu save givim traket ya long man blong haos, nomata sipos hem i wantem karem narafala buk no i no wantem. Yumi save yusum traket ya tu, taem yumi prij long ol stoa mo ofis, long rod, taem yumi raetem wan leta, mo taem yumi gobak visitim man we i intres. Mo yumi save lego traket ya tu long ol haos we i no gat man long olgeta. I gud yu karem traket ya wetem yu, taem yu go long ol pablik transpot, taem yu go blong pem ol samting long stoa, mo taem yu stap long wok. Ol tok long laswan pej blong traket ya i eksplenem klia, rod we yumi folem blong stadi Baebol, mo i talemaot buk ya Baebol Tijim.
4. ?Olsem wanem yumi save yusum traket ya ?Yu Yu Wantem Save Trutok? blong statem wan stadi?
4 Afta we yu givim traket ya long man, yu save soem ol kwestin we oli stap long faswan pej, mo yu save askem long hem se: “?Weswan long ol kwestin ya we yu yu intres moa long hem?” Biaen, yutufala i save tokbaot ansa we i stap long traket ya. Mo yutufala i save ridim no tokbaot ol tok long laswan pej, we oli eksplenem olsem wanem yumi stap mekem Baebol stadi long man. Yu save soem long hem weples long buk ya Baebol Tijim we hem i save faenem moa save long saed blong kwestin ya, mo yu save givim buk ya long hem. Biaen, yu save mekem plan blong gobak mo gohed long storian ya.
5. ?From wanem yumi mas rere oltaem blong askem long man blong i stadi Baebol?
5 I gat plante man yet long teritori blong yumi, we oli wantem tumas blong save wanem we Baebol i rili tijim. Taswe, sipos yumi rere oltaem blong statem wan Baebol stadi wetem ol man, bambae yumi gat moa janis blong halpem olgeta blong oli folem rod ya blong laef. Mo bambae yumi kasem glad long wok ya we yumi mekem.—Mat. 7:13, 14.