“These Words . . . Must Be on Your Heart”

Ol papa mo mama oli olsem ol man blong lukaot long sipsip. Oli mas lukaot gud long pikinini blong olgeta, blong oli no kasem trabol mo lego trutok. (Prov. 27:23) ?Ol papa mo mama oli save mekem wok ya olsem wanem? Evri dei oli mas storian wetem ol pikinini blong olgeta blong save samting we i stap long tingting mo hat blong olgeta. (Prov. 20:5) Mo tu, ol papa mo mama oli mas yusum ol samting we faea i no save bonem, olsem ol tul we ogenaesesen i givim, blong mekem bilif blong ol pikinini blong olgeta i kam strong moa. (1 Kor. 3:10-15) Video ya “These Words . . . Must Be on Your Heart” i soemaot se i impoten tumas blong mekem famle wosip oltaem. I gud we famle i wajem mo tokbaot ol kwestin ya.

(1) ?Wanem i mekem se famle blong Roman i no moa gohed gud long trutok? (2) ?From wanem famle wosip we brata Roman i mekem i no gohed gud? (3) ?Wanem advaes blong Baebol we i save givhan blong tijim gud ol pikinini blong oli gohed gud long trutok? (Dut. 6:6, 7) (4) ?Wanem i save mekem se famle i toktok gud wanples? (5) ?Ol pikinini oli nidim we ol papa mo mama oli mekem wanem blong givhan long olgeta? (6) ?Brata mo Sista Barrow i givhan olsem wanem long famle blong Roman? (Prov. 27:17) (7) ?Ol papa oli mas rerem wanem samting fastaem blong mekem se famle wosip i save gohed gud? (8) ?Brata Roman i mekem wanem samting blong givhan long famle blong hem? (9) ?From wanem oltaem i impoten blong mekem famle wosip long wan stret taem? (Efes. 6:4) (10) ?Ol famle oli save mekem wanem long taem blong famle wosip? (11) ?Brata Roman i givhan long Marcus olsem wanem blong hem i wantem mekem ol samting we i stret? (Jer. 17:9) (12) From we Rebecca i stap frenem Justin, ?olsem wanem Brata mo Sista Roman i givhan long hem blong mekem wan waes desisen? (Mak 12:30; 2 Tim. 2:22) (13) ?Olsem wanem Brata mo Sista Roman i soemaot se tufala i gat bilif taem tufala i mekem sam jenis long laef blong tufala? (Mat. 6:33) (14) ?Video ya i givhan long ol hed blong famle olsem wanem blong lukaot long famle blong oli gohed gud long trutok? (1 Tim. 5:8) (15) ?Hed blong famle, yu yu gat strong tingting blong mekem wanem?

ADVAES I GO LONG HED BLONG FAMLE: Drama ya i kamaot long 2011 long asembli blong tri dei. Long taem ya, ?yu yu luksave se yu mas mekem sam samting blong famle wosip blong yufala i kam gud moa? ?Be olsem wanem naoia? Sipos yu luk se yu mas mekem sam moa jenis, plis i gud yu prea long Jehova blong i givhan long yu blong mekem ol jenis ya. Olsem nao famle blong yu i save harem gud naoia, mo long fiuja.—Efes. 5:15-17.