STADI 21
SINGSING 107 God i Soemaot Eksampol Blong Lav
?Olsem Wanem Blong Faenem Wan Gudfala Brata o Sista Blong Mared Wetem?
“?Hu i save faenem wan waef we i naf blong wokem evri samting? Praes blong waef olsem, i sas moa i winim praes blong ol korel.”—PROV. 31:10.
BIGFALA TINGTING
Long stadi bambae yumi luk olsem wanem ol stamba trutok blong Baebol oli save givhan long ol brata mo sista we oli wantem faenem wan blong mared wetem mo olsem wanem olgeta long kongregesen oli save sapotem olgeta we oli singel we oli wantem mared.
1-2. (1) ?Ol singel Kristin oli mas tingbaot wanem bifo we oli stat blong fren? (2) ?Tok ya “fren” i minim wanem? (Yu luk “Mining Blong Toktok.”)
?YU YU wantem mared? Nating se mared i no stamba samting we i mekem man i glad, be plante singel Kristin, nating se oli yangfala o olfala, oli wantem tumas blong faenem wan blong mared wetem. Be bifo we yu stat blong fren, fastaem i impoten we yu fren gud wetem Jehova, savegud yu wan, mo yu save olsem wanem blong yusum gud mane.a (1 Kor. 7:36) Sipos yu mekem olsem, bambae yu save gat wan gudfala mared.
2 I no isi oltaem blong faenem wan gudfala brata o sista blong mared wetem. (Prov. 31:10) Mo nating sipos yu faenem wan we yu wantem savegud hem, be maet i no isi blong yutufala i stat blong fren.b Long stadi ya, bambae yumi tokbaot samting we i save halpem ol singel Kristin blong faenem wan gudfala brata o sista, mo stat blong fren. Mo tu, bambae yumi luk olsem wanem olgeta long kongregesen oli save sapotem olgeta we oli wantem mared.
?OLSEM WANEM BLONG FAENEM WAN GUDFALA BRATA O SISTA BLONG MARED WETEM?
3. ?Wan singel Kristin i mas tingbaot wanem taem hem i stap lukaot wan blong mared wetem?
3 Sipos yu wantem mared, fastaem i gud yu tingbaot ol fasin we yu wantem se gelfren blong yu i gat.c Sipos yu no tingting gud fastaem, maet yu save mestem wan gudfala sista we i gat ol fasin ya, nao yu frenem wan we i no stret long yu. I tru se woman we yu jusum i mas wan sista we i baptaes. (1 Kor. 7:39) Be i no evri sista we yu save mared wetem. Taswe i gud blong askem se: ‘?Wanem ol mak blong mi? ?Wanem ol fasin we mi ting se i impoten we sista ya i gat? ?Ol fasin we mi wantem se hem i gat, oli stret?’
4. ?Samfala oli tokbaot wanem long ol prea blong olgeta?
4 Sipos yu wantem mared, i sua se yu bin prea from finis. (Fil. 4:6) I tru, Jehova i no promes blong givim wan sista blong yu mared wetem. Be hem i tingbaot ol filing mo ol nid blong yu, mo hem i save halpem yu blong faenem wan gudfala sista. Taswe i gud yu gohed blong talemaot ol tingting mo filing blong yu long hem. (Sam 62:8) Prea blong yu gat longfala tingting mo waes. (Jem. 1:5) Jon,d we i wan singel brata long Yunaeted Stet, i tokbaot ol samting we hem i stap prea from, hem i se: “Mi talemaot long Jehova ol fasin we mi wantem luk long wan sista, mo mi prea blong mi save gat janis blong mitim wan gudfala sista olsem. Mo tu, mi askem blong Jehova i halpem mi blong wokem ol fasin we bambae i mekem se mi kam wan gudfala hasban.” Tanya, we i wan sista long Sri Lanka, i talem se: “Taem mi stap wet blong faenem wan gudfala boe, mi askem Jehova blong i halpem mi blong mi holemstrong long hem, gat gudfala tingting, mo stap glad.” Nating se yu no faenem wan naoia, be Jehova i promes se bambae hem i gohed blong lukaot gud long yu long saed blong bodi mo filing.—Sam 55:22.
5. ?Wetaem ol singel Kristin oli save mitim ol narawan we oli lavem Jehova? (1 Korin 15:58) (Mo tu, yu luk pija.)
5 Baebol i leftemap tingting blong yumi se yumi mas gohed blong gat “plante wok blong mekem long wok blong Masta.” (Ridim 1 Korin 15:58.) Taem yu bisi long wok blong Jehova mo yu spenem taem wetem ol defdefren brata mo sista, bambae yu harem gud tumas long kampani blong olgeta, be tu bambae yu gat janis blong mitim plante narafala singel Kristin we olgeta tu oli wok strong long wok blong Jehova. Mo taem yu mekem bes blong yu blong mekem samting we Jehova i wantem, bambae yu kasem trufala glad.
Sipos yu bisi oltaem long wok blong Jehova mo yu spenem taem wetem ol defdefren brata mo sista, yu save mitim samfala we oli wantem tumas blong mared (Haf 5)
6. ?Ol singel Kristin oli mas tingbaot wanem taem oli stap lukaotem wan blong mared wetem?
6 Yu mas lukaot gud blong no letem tingting ya blong faenem wan sista blong mared wetem, i kam moa impoten long laef blong yu. (Fil. 1:10) Blong kasem trufala glad, hemia i no dipen se yu singel o yu mared, be i dipen long frensip blong yu wetem Jehova. (Mat. 5:3) Mo naoia we yu singel, yu gat plante janis blong mekem moa long wok blong prij. (1 Kor. 7:32, 33) Taswe, yusum gud taem ya. Jessica, wan sista long Yunaeted Stet we i mared taem i gat klosap 40 yia, i talem se: “Mi mi bisi long wok blong prij, taswe mi stap glad nating se mi wantem blong mared.”
TEKEM TAEM BLONG LUKLUK
7. ?From wanem i waes we yu tekem taem blong lukluk gud wan sista fastaem, bifo we yu talem long hem se yu laekem hem? (Ol Proveb 13:16)
7 ?Olsem wanem sipos yu luk wan sista mo yu ting se bambae hem i kam wan gudfala waef blong yu? ?Bambae yu kwik blong talemaot long hem se yu laekem hem? Baebol i talem se man we i waes i tingting gud bifo we i tekem aksen. (Ridim Ol Proveb 13:16.) Taswe i waes we yu tekem taem blong lukluk gud fastaem, bifo we yu talemaot long hem se yu laekem hem. Aschwin, wan brata long Netalan, i talem se: “Ol filing oli save kam antap kwiktaem, be oli save lus kwiktaem tu. Taswe sipos yu tekem taem blong lukluk gud wan sista, bambae frensip blong yutufala i no stanap long ol filing nomo.” Mo tu, bambae yu naf blong luksave se sista ya i no stret long yu.
8. ?Olsem wanem wan brata i save tekem taem blong lukluk wan sista we hem i wantem frenem? (Mo tu, yu luk pija.)
8 ?Olsem wanem yu save tekem taem blong lukluk wan sista we yu wantem frenem? Taem yu stap long ol miting blong kongregesen o yu joen wetem ol brata mo sista, yu save lanem sam samting long saed blong hem. Yu save luk ol fasin blong hem, olsem wanem hem i tritim ol narafala, hu ya ol fren blong hem, hem i laekem blong tokbaot wanem, mo luk sipos hem i strong long spirit. (Luk 6:45) ?Hem i gat ol semfala mak olsem yu? Maet yu save toktok wetem ol elda long kongregesen blong hem, o long wan Kristin we i bigman long spirit we i savegud hem. (Prov. 20:18) Yu save askem sipos hem i gat gudnem mo ol gudfala fasin. (Rut 2:11) Taem yu stap lukluk wan sista we yu laekem hem, yu mas lukaot gud se yu no mekem hem i sem. Yu mas respektem ol filing blong hem, mo yu no traem spenem tumas taem wetem hem, o traem blong faenemaot evri samting long saed blong hem.
Bifo we yu talem long wan gel se yu laekem hem, yu mas tekem sam taem blong lukluk hem fastaem (Haf 7-8)
9. Bifo we yu talemaot ol filing blong yu long wan sista, ?yu mas tingbaot wanem?
9 ?Bambae yu tekem hamas taem blong lukluk wan sista bifo we yu talemaot se yu laekem hem? Sipos yu kwik tumas blong talemaot ol filing blong yu, bambae hem i ting se yu no tingting gud bifo we yu mekem wan desisen. (Prov. 29:20) Be sipos sista ya i luksave se yu laekem hem, mo yu tekem longtaem tumas blong talem long hem, maet hem i save gat tingting ya se yu no save mekem ol desisen. (Pri. 11:4) Tingbaot se bifo we yu talemaot filing blong yu long sista ya, yu no mas trastem se hem nao we bambae yu maredem. Be yu mas sua se yu yu rere blong mared, mo se sista ya i save kam wan gudfala waef blong yu.
10. ?Yu mas mekem wanem sipos wan brata o sista i laekem yu, be yu no gat tingting blong frenem hem?
10 ?Olsem wanem sipos yu luksave se wan brata o sista i laekem yu? Sipos yu no gat tingting blong frenem hem, yu mas soemaot klia long ol aksen blong yu. I nogud yu givim rong tingting long hem se yu tu yu laekem hem, be i no tru.—1 Kor. 10:24; Efes. 4:25.
11. Sipos oli askem yu blong faenem wan fren blong wan singel brata, ?yu mas tingbaot wanem?
11 Long sam kantri ol perens nao oli jusum hasban o waef blong ol pikinini blong olgeta. Mo long sam narafala ples, sipos wan i wantem mared, ol famle o fren blong hem bambae oli lukaotem wan we oli ting se i stret, ale oli mekem plan blong tufala i mit mo luk sipos tufala i stret long tufala. Sipos wan brata i wantem mared mo oli askem yu blong faenem wan fren blong hem, i gud yu faenemaot fastaem samting we tufala wanwan i laekem mo nidim. Sipos yu ting se yu faenem wan sista we i stret long brata ya, i gud yu traem savegud hem, ol fasin blong hem, mo antap moa luk sipos hem i fren gud wetem Jehova, from we hemia nao samting we i moa impoten i bitim mane, edukesen, o se man i rij o i pua. Be yu mas tingbaot se long en, tufala nao i mas mekem desisen se bambae tufala i mared o nogat.—Gal. 6:5.
STAT BLONG FREN
12. Sipos yu wantem frenem wan sista, ?olsem wanem bambae yu go askem hem?
12 Sipos yu wantem frenem wan sista, ?olsem wanem bambae yu go askem hem?e Yu save mekem plan blong storian wetem hem long wan pablik ples, o tru long telefon. Talemaot klia se yu laekem hem mo wantem savegud hem moa. (1 Kor. 14:9) Sipos i nidim, givim taem long hem blong i tingting gud fastaem bifo we i givim wan ansa. (Prov. 15:28) Mo sipos hem i talem se hem i no wantem frenem yu, i gud yu respektem filing blong hem.
13. ?Bambae yu mekem wanem sipos wan brata i kam askem fren long yu? (Kolosi 4:6)
13 ?Olsem wanem sipos wan brata i talem se hem i laekem yu? I sua se hem i mas gat strong tingting blong kam toktok long yu, taswe yu mas kaen mo soem respek. (Ridim Kolosi 4:6.) Sipos yu nidim taem blong tingting gud fastaem bifo we yu ansa, i gud yu talemaot klia long hem. Be i nogud yu wet longtaem tumas blong givim wan ansa long hem. (Prov. 13:12) Mo sipos yu no rere blong frenem hem, i gud yu toktok kaen, mo yu talemaot klia. Makem samting we Hans, we i wan brata long Ostria, i mekem taem wan sista i kam askem hem. Hem i se: “Mi talemaot tingting blong mi stret long taem ya mo long kaen fasin, from mi no wantem mekem hem i gat rong tingting se wan dei bambae mi frenem hem yet. Mo tu, mi lukaot gud long ol samting we mi talem mo mi mekem, blong mi no givim rong tingting long hem se mi jenisim tingting blong mi.” Be sipos yu tu yu agri blong frenem hem, i gud yu talemaot klia ol filing blong yu, mo yutufala i tokbaot ol samting we yutufala i mas mekem mo no mekem taem yutufala i stap fren. Maet tingting blong yutufala bambae i no sem mak, mo hemia i dipen long kalja blong yutufala o sam narafala samting bakegen.
?OLSEM WANEM OL NARAFALA OLI SAVE SAPOTEM OL SINGEL KRISTIN?
14. ?Olsem wanem yumi save sapotem ol singel Kristin?
14 ?Olsem wanem yumi evriwan i save sapotem ol singel Kristin we oli wantem mared? Wan rod hemia blong lukaot gud long ol toktok blong yumi. (Efes. 4:29) Yumi save askem yumi wan se: ‘?Mi mi stap jikim olgeta we oli wantem mared? Taem mi luk wan singel brata mo sista i stap toktok, ?mi gat tingting se tufala i stap laeklaekem tufala?’ (1 Tim. 5:13) Mo tu, yumi neva mas mekem ol singel Kristin oli harem se wan samting i rong long olgeta, from we oli no mared. Hans, we yumi tokbaot hem finis, i talem se: “Sam brata mo sista oli stap talem long mi se, ‘?From wanem yu no mared? Yu stap kam olfala nao.’ Ol toktok olsem oli mekem ol singel Kristin oli harem se ol narafala oli no tinghae long olgeta, mo i mekem oli harem se oli mas mared nomo.” !Taswe i gud yumi lukaot evri rod blong talem ol gudfala toktok long olgeta!—1 Tes. 5:11.
15. (1) Folem Rom 15:2, ?yumi mas tingbaot wanem taem yumi wantem halpem wan singel Kristin blong i faenem wan blong i mared wetem? (Mo tu, yu luk pija.) (2) ?Wanem oli impoten lesen we yu lanem long video?
15 ?Olsem wanem sipos yumi tingbaot se wan brata mo wan sista i stret gud long tufala? Baebol i talem se yumi mas tingbaot filing blong ol narafala. (Ridim Rom 15:2.) Sam singel Kristin oli no wantem we narafala i jusum wan we oli mas frenem, mo yumi mas respektem tingting blong olgeta. (2 Tes. 3:11) Sam narafala maet oli wantem se yumi halpem olgeta, be yumi no mas mekem sipos oli no askem.f (Prov. 3:27) Mo sam narafala singel Kristin oli no laekem taem yu kam talem stret long olgeta se wan brata o sista i stret long olgeta. Lydia, we i wan singel sista long Jemani, i talem se: “Yu save invaetem wan singel brata mo sista i kam joen long wan bigfala grup, mo hemia bambae i givim janis long tufala blong spenem taem tugeta, nao tufala i save mekem prapa desisen blong tufala.”
Taem ol brata mo sista oli joen wanples, hemia wan gudfala janis blong ol singel Kristin oli mitim olgeta (Haf 15)
16. ?Ol singel Kristin oli mas tingbaot wanem?
16 !Nating se yumi singel o mared, be yumi evriwan i save gat wan hapi laef! (Sam 128:1) Taswe, sipos yu wantem mared be yu no faenem wan stret wan yet, i gud yu gohed blong stap bisi long wok blong Jehova. Wan sista long Makao we nem blong hem Yi, i talem se: “Sipos yu skelem taem ya we bambae yu spenem wetem hasban o waef blong yu long Paradaes, bambae yu luk se taem ya we yu stap singel i sot tumas. Taswe, yusum gud taem ya.” ?Be olsem wanem sipos yu faenem wan singel brata o sista mo yutufala i stat fren naoia? Long nekis stadi bambae yumi tokbaot olsem wanem yu save fren long wan fasin we i givim ona long Jehova.
SINGSING 137 Ol Woman Blong Bilif, Ol Kristin Sista
a Blong faenemaot sipos yu rere blong mared o nogat, yu luk haf ya “Boefren Mo Gelfren—Pat 1: ?Mi Mi Rere Blong Fren?” we i stap long jw.org
b MINING BLONG TOKTOK: Tok ya “fren” we oli yusum long stadi ya mo long nekis stadi, i blong tokbaot taem ya we wan boe mo wan gel i stap traem blong savegud tufala blong luk sipos tufala i save kam wan gudfala hasban o waef, mo tufala i stret long tufala o nogat. Long sam kantri, oli yusum tok ya blong tokbaot wan boe mo wan gel we i stap fren, tufala i stat blong traem savegud tufala, o tufala i gat filing long tufala. Be yumi save yusum tok ya “fren,” stat taem wan boe mo wan gel i soemaot klia se tufala i gat filing long tufala, mo go kasem taem we tufala i mekem desisen se bambae tufala i mared, o tufala i stop blong fren.
c Long ol paragraf we i kam biaen, bambae yumi yusum tok ya ol brata, be hemia sem rul we i go tu long ol sista.
d Mifala i jenisim sam nem.
e Long sam kalja, plante taem wan brata nao i go askem fren long wan sista. Be wan sista tu i save go askem wan brata, mo hemia i stret nomo. (Rut 3:1-13) Blong save moa, yu luk haf ya “Ol Yangfala Oli Askem . . . ?Olsem Wanem Mi Save Talemaot Filing Blong Mi Long Hem?” long Wekap! blong Jenuware 2005, pej 22-24.
f Yu go long jw.org mo yu wajem video ya Oli Faet Strong Blong Holemtaet Bilif—Ol Kristin We Oli No Mared.