?From Wanem Politik i Seraotem Ol Man? ?Baebol i Talem Wanem?

Long plante kantri blong wol, ol man oli stap seseraot. Long wan stadi we Pew Risej Senta i mekem long 2022, oli faenemaot se “65% blong ol man long 19 kantri, we oli stadi long olgeta, oli talem se ol man we oli sapotem ol defdefren politik pati long kantri blong olgeta, oli no save agri o oli stap raorao bigwan.”

?Yu yu luk se long kantri blong yu ol man oli stap seraot moa from politik? ?From wanem i olsem? ?Olsem wanem blong winim samting ya? Tingbaot samting we Baebol i talem.

Ol fasin we oli mekem ol man oli seseraot

Baebol i talem se long taem blong yumi, hemia “ol las dei,” fasin blong plante man bambae i mekem se oli no save joen gud.

• “Long ol las dei, laef bambae i strong tumas mo bambae i had blong winim ol trabol. Bambae ol man oli tingbaot olgeta nomo, . . . oli no save agri long wan tingting.”—2 Timoti 3:1-3.

Nating se plante man oli wok had blong mekem se gavman i halpem ol man, oli no save winim ol problem. Ol man we oli gat defdefren tingting, oli faenem i had, o i luk olsem se i no posibol, blong oli wok wanples blong winim ol problem. Samting ya i soemaot se ol tok we Baebol i talem longtaem finis, i tru tumas.

• “Sam man oli bos mo ol narafala man we oli stap aninit long olgeta, oli stap harem nogud.”—Prija 8:9.

Be Baebol i talem tu se bambae i gat wan rod blong winim trabol ya, hemia wan gavman we lida blong hem i naf blong finisim ol trabol tede we i mekem ol man oli safa.

Wan gudfala lida we i kea long ol man

Baebol i tokbaot wan lida we i gat ol gudfala fasin mo hem i naf blong winim ol problem, hemia Jisas Kraes. Jisas i gat paoa, haenem, mo i wantem se ol man oli joen gud mo stap long pis.

• “Long ol dei blong hem, bambae ol stret man oli olsem gras we i gru gud, mo bambae i gat pis long evri ples.”—Sam 72:7.

• “Olgeta nesen bambae oli wok blong hem.”—Sam 72:11.

Jisas i wan nambawan lida from we hem i kea long ol man mo i wantem halpem olgeta, speseli olgeta we ol narafala oli no mekem i stret long olgeta.

• “Bambae hem i sevem ol puaman we oli stap krae from help, mo olgeta we oli no gat nem, mo olgeta we i no gat helpa. Bambae hem i gat sore long man we i no gat nem, mo puaman, mo bambae hem i sevem laef blong man we i pua. Bambae hem i tekemaot olgeta long han blong ol man we oli mekem i strong tumas long olgeta, mo long raf fasin.”—Sam 72:12-14.

Lanem moa long saed blong Kingdom blong God, hemia gavman long heven we Jisas i lida blong hem. Faenemaot olsem wanem rul blong gavman ya i save givhan long yu mo olsem wanem yu save sapotem.

• Wajem video ya ?Wanem Ya Kingdom Blong God?

• Ridim atikol ya long Inglis o Franis “God’s Kingdom—A Government With No Corruption.”