Plante Man Oli Harem Se Oli Stap Olgeta Wan—?Baebol i Talem Wanem?

Wan stadi we oli mekem i no longtaem i pas,a i soemaot se plante man raon long wol (samwe 25 pesen) oli harem se oli stap olgeta wan.

• “Nomata se yumi yangfala o olfala mo yumi stap wea, be yumi evriwan i save fesem problem ya blong stap yumi wan mo no gat ol fren.”—Chido Mpemba, wan lida blong Commission on Social Connection long Wol Helt Oganaesesen.

Plante man oli ting se olgeta nomo we oli olfala o oli no joen tumas wetem ol narafala, oli save harem se oli stap olgeta wan. Be hemia i no tru. Plante man mo woman we oli gat gudfala helt, ol yangfala, olgeta we oli mared, mo olgeta we oli gat plante samting, olgeta tu oli harem olsem. Sipos wan man i no joen wetem ol narafala mo oltaem i harem se hem i stap hem wan, hemia i save spolem helt blong hem.

• Dokta Vivek Murthy, we i hed blong ol dokta long Yunaeted Stet, i talem se: “Taem wan man i harem se hem i stap hem wan, hemia i no jes wan nogud filing, be i save spolem helt blong hem. Hemia i olsem we hem i smokem 15 sigaret evri dei.”

Samting we Baebol i talem

God ya we i wokem yumi i no wantem se yumi stap yumi wan. God i wantem se ol man oli joen gud wetem ol narafala mo oli gat ol gudfala fren.

• Advaes blong Baebol: “Jehova God i talem se: ‘I nogud we man ya i gohed blong stap hem wan.’”—Jenesis 2:18.

God i wantem se yumi kam fren blong hem. Hem i promes se sipos yumi traehad blong kam klosap long hem, bambae hem tu i kam klosap long yumi.—Jemes 4:8.

• Advaes blong Baebol: “Olgeta we oli haremsave se oli nidim God long laef blong olgeta, oli glad from we Kingdom blong heven i blong olgeta.”—Matiu 5:3.

God i wantem se yumi joen wetem ol narafala blong wosipim hem. Sipos yumi mekem olsem, bambae yumi glad moa.

• Advaes blong Baebol: “I gud yumi stap tingbaot yumi, blong yumi givgivhan long yumi blong yumi lavem ol narafala, mo blong yumi mekem ol gudfala wok. Yumi no mas les blong kam wanples long ol miting blong yumi . . . . Oltaem yumi mas toktok gud blong leftemap tingting blong yumi.”—Hibru 10:24, 25.

Blong faenemaot from wanem i impoten blong winim filing ya se yu stap yu wan, ridim atikol ya “?Yu Yu Harem Se Yu Stap Yu Wan?—?Wanem i Save Givhan?”