?Baebol i Talem Wanem Long Fasin Ya We Man i Fri Blong Jus? ?God i Kontrolem Evri Samting Long Laef Blong Yu?
Ansa we Baebol i givim
God i wokem yumi long fasin we yumi fri blong jusum samting we yumi wantem. Yumi gat paoa blong mekem prapa desisen blong yumi, i bitim we God no ol narafala oli mekem desisen long samting we yumi mas mekem. Traem luk samting we Baebol i tijim.
God i mekem ol man blong oli tekem fasin blong hem. (Jenesis 1:26) Yumi no olsem ol anamol we oli mekem ol samting folem fasin we oli bon wetem. Yumi, yumi olsem God ya we i mekem yumi, yumi naf blong soemaot ol fasin olsem lav mo stret fasin. Mo olsem God blong yumi, yumi fri blong jusum samting we yumi wantem.
Bigfala samting se, yumi naf blong save fiuja blong yumi. Baebol i pulum yumi blong yumi jusum ‘laef mo obei long God.’ Hemia i min se yumi jusum blong obei long ol loa blong hem. (Dutronome 30:19, 20) Sipos yumi no fri blong jusum samting we yumi wantem, bambae yumi harem se samting we Baebol i talem i no gat mining, mo i no stret nating. God i no fosem yumi blong mekem samting we hem i talem, be hem i talem se: “Sipos yufala i bin obei long ol tok blong mi, ol gudgudfala samting we mi mi save mekem long yufala, bambae oli save kam long yufala, olsem wan gudfala reva we i stap ron.”—Aesea 48:18.
Ol gudfala samting we oli kamaot long laef blong yumi mo ol trabol, oli no kamaot from laki nomo, nogat. Sipos yumi wantem kasem wan gudfala samting, yumi mas wok had from. Baebol i talem se: “Wanem samting we yumi stap mekem, yumi mas strong long hem long fulpaoa blong yumi.” (Prija 9:10) Mo i talem tu se: “Man we i mekem gudfala plan mo i stap wok strong long hem, hem i save kasem plante samting.”—Ol Proveb 21:5.
Fasin ya we yumi fri blong jus, hem i wan gudfala presen we God i givim long yumi. Presen ya i mekem se yumi lavem God long “olgeta hat” blong yumi, from we yumi wantem mekem olsem.—Matiu 22:37.
?God i kontrolem evri samting?
Baebol i talem se God i gat Olgeta Paoa, hemia i min se i no gat man i naf blong blokem paoa ya blong hem. (Job 37:23; Aesea 40:26) Be hem i no yusum paoa ya blong kontrolem evri samting. Eksampol, Baebol i talem se God i ‘bos long tingting blong hem,’ nao i no kwik blong spolem ol man Babilon we oli enemi blong ol man blong hem. (Aesea 42:14) Sem mak tede, hem i jusum blong no hareap blong spolem ol man we oli yusum fasin fri blong olgeta blong spolem ol narafala. Be God bambae i no mekem olsem olwe.—Ol Sam 37:10, 11.