?Ol Witnes Blong Jehova Oli Tekem Meresin Mo Tritmen We Dokta i Givim?

Yes, ol Witnes blong Jehova oli tekem meresin mo tritmen we dokta i givim. Mifala i traehad blong lukaot gud long bodi blong mifala, be samtaem mifala i “nidim dokta.” (Luk 5:31) Mo sam long ol Witnes blong Jehova oli dokta, olsem Kristin man ya Luk we i laef long taem bifo.—Kolosi 4:14.

Be i gat sam tritmen we mifala i no save tekem, from we Baebol i agensem. Olsem nao, mifala i no tekem blad blong narafala man i go long bodi blong mifala. Baebol i putum tabu long blad, se yumi no mas yusum long fasin olsem. (Ol Wok 15:20) Mo Baebol i putum tabu long ol tritmen we oli joen wetem wok blong rabis spirit tu.—Galesia 5:19-21.

Be bighaf blong ol meresin mo tritmen, Baebol i no agensem. Ol Witnes wanwan oli mas jusum se oli wantem olgeta no oli no wantem. Maet wan Witnes i tekem wan meresin no tritmen, be wan narafala Witnes i no wantem.—Galesia 6:5.