OL YANGFALA OLI ASKEM
?From Wanem Mi Mas Mekem Pis Wetem Ol Brata Mo Sista Blong Mi?
“Mifala i besfren be samtaem mifala i badfren”
Ol brata mo sista blong yu oli ‘ol besfren blong yu, be samtaem oli save kam badfren.’ Yu yu lavem olgeta mo oli lavem yu, be samtaem yufala i raorao. Helena we i gat 18 yia, i talem se: “Smol brata blong mi i hambag long mi oltaem. !Hem i save gud olsem wanem blong mekem mi mi kros!”
Blong stretem sam problem, i nidim nomo blong yufala i toktok gud tugeta. Eksampol:
Maet tu brata we tufala i serem wan rum i rao from we tufala i neva save stap wanwan long rum. ?Olsem wanem blong stretem problem ya? Folem advaes blong Luk 6:31, tufala i mas lanem blong givim taem long narawan blong i save stap hem wan samtaem.
Maet wan long tufala sista i stap werem klos blong narawan, be i no askem fastaem. ?Olsem wanem blong stretem problem ya? Folem advaes blong 2 Timoti 2:24, tufala i mas tokbaot tugeta, mo putum sam rul blong tufala i folem.
Samtaem ol problem oli bigwan, mo i save gat nogud frut i kamaot. Tingbaot tu eksampol we Baebol i tokbaot:
Miriam mo Eron, tufala i jalus long brata blong tufala, Moses. Ridim stori ya long Namba 12:1-15, mo makem ol nogud frut we i kamaot. Nao tingbaot se: ‘?Mi mas mekem wanem blong mi no jalus long brata o sista blong mi?’
Ken i kros long brata blong hem Ebel, gogo i kilim Ebel i ded. Ridim stori ya long Jenesis 4:1-12. Nao tingbaot se: ‘?Olsem wanem mi save kontrolem mi wan, taem mi kros long brata o sista blong mi?’
Tu risen blong mekem pis
Nating se i had blong joen gud wetem ol brata mo sista blong yu, be i gat tu risen blong traehad.
Soemaot se yu bigman long tingting blong yu. Yangfala Alex i talem se: “Bifo, mi stap kam kros kwik long tu smol sista blong mi. Naoia mi save stap kwaet mo gat longfala tingting. Ating yumi save talem se mi kam bigman finis.”
Baebol i talem se: “Man we i no save kros kwik, hem i gat fasin luksave, be man we i no gat longfala tingting, i stap soemaot ol krangke fasin blong hem.”—Ol Proveb 14:29.
Gudfala trening blong fiuja. Sipos yu kam kros oltaem from ol smosmol samting we ol brata mo sista blong yu oli mekem, ?olsem wanem long hasban o waef blong yu taem bambae yu mared, o olgeta we yu wok wetem olgeta, o bos blong yu, o eni narafala man o woman?
Samting we i save hapen: Long fiuja, yu mas naf blong toktok gud wetem ol narafala blong yu save fren gud wetem olgeta. Insaed long famle nao i beswan ples blong lanem blong toktok gud tugeta.
Baebol i talem se: “Sipos i gat rod, yufala i mas mekem bes blong yufala blong yufala i gat pis.”—Rom 12:18.
?Yu nidim help blong stretem wan problem wetem brata o sista blong yu? Sipos yes, ridim “?Sam yangfala oli talem wanem?” mo biaen lukluk Pepa Blong Fulumap we i joen wetem haf ya, nem blong hem ”Fren Gud Wetem Ol Brata Mo Sista Blong Yu.”