Translesen Blong Program Blong Bigfala Asembli 2020 !“Oltaem Yufala i Mas Glad”!

Long Julae mo Ogis 2020, ol brata mo sista long fulwol oli wajem program blong bigfala asembli, evriwan wantaem. Hemia i neva hapen bifo. Blong mekem se samting ya i posibol, ol transleta oli mas transletem ol rikoding blong program i go long bitim 500 lanwis. Oltaem i nidim wan yia blong mekem plan mo finisim wan projek olsem. Be from Korona pandemik, oli mas transletem Bigfala Asembli 2020 !“Oltaem Yufala i Mas Glad”! long fo manis nomo.

Translation Services mo Global Purchasing long Wol Hedkwota Blong Ol Witnes Blong Jehova, oli givhan gud long bigfala wok ya. Translation Services i luksave se long plante ples, ol transleta oli nidim moa tul blong mekem bigfala wok ya, speseli ol gudfala maekrofon. Ale Global Purchasing i pem 1,000 maekrofon mo sanem olgeta oli go long klosap 200 ples long wol.

Blong sevem mane, oli pem olgeta maekrofon wantaem, kampani i sanem olgeta i go long wan ples nomo, nao ol brata oli sanem olgeta oli goaot long ol defren ples long wol. From we oli pem bigfala namba blong maekrofon wantaem, praes blong wanwan maekrofon mo praes blong sanemaot, i samwe long 18,000 vatu. Praes ya i 20 pesen moa jip i bitim we oli pem wanwan maekrofon.

Global Purchasing i mas pem mo sanemaot ol samting ya long manis Eprel mo Mei 2020, hemia wan taem we plante bisnes oli no wok gud from pandemik. Nating se i olsem, long en blong Mei, bighaf blong ol translesen ofis, branj ofis, mo ol narafala ples we wok blong translesen i gohed, oli kasem ol tul we oli nidim.

Jay Swinney, we i lukaot long Global Purchasing, i talem se: “Ol dipatmen long Betel oli wok gud wetem ol bisnesman long projek ya. Spirit blong Jehova nomo i mekem se mifala i save mekem wok ya kwik, mo yusum gud presen mane blong ol brata mo sista, blong sapotem wok blong Jehova.”

Nicholas Ahladis, we i wok long Translation Services, i talem se: “Long taem ya, ol transleta oli no save joen wanples long tim blong olgeta. Be nating se oli stap wanwan olbaot, oli gat rod blong toktok tugeta, nao oli transletem mo rikodem ol tok, drama, mo singsing, long bitim 500 lanwis.”

Hemia wan nomo long plante projek we oli wokem blong rerem Bigfala Asembli 2020 !“Oltaem Yufala i Mas Glad”! blong ol brata mo sista long fulwol oli save harem gud long hem. Presen mane we yu sanem tru long donate.jw.org mo long ol narafala rod, oli mekem se i posibol blong pem ol impoten samting ya.