Ol Video Blong Bigfala Asembli 2020 !“Oltaem Yufala i Mas Glad”!

Ol video long ol bigfala asembli oli tajem hat blong yumi, mo oli givhan long yumi blong kasem save moa long ol tijing blong Baebol. Long Bigfala Asembli 2020 !“Oltaem Yufala i Mas Glad”! i gat 114 video, wetem 43 tok we ol memba blong Hed Kampani mo ol helpa blong olgeta oli givim. ?Yu bin tingbaot hadwok mo mane we oli nidim blong mekem ol video ya?

Klosap 900 brata mo sista long fulwol oli yusum taem mo gudhan blong olgeta blong mekem ol video ya. Long tu yia, oli spenem klosap 100,000 aoa long projek ya. Oli yusum 70,000 long ol aoa ya blong mekem wan muvi blong 76 minit long saed blong wan stori long Baebol, nem blong hem, Nehemaea: “Glad We i Kamaot Long Jehova, Hem i Strong Ples Blong Haed.”

Olsem yu save finis, i nidim bigfala mane blong givim ol samting we ol volontia ya oli nidim blong laef, wetem ol teknoloji, ol tul, mo ol ples blong wok we oli stret long projek blong olgeta.

Jared Gossman, we i wok long Odio/Video Sevis, i talem se: “Tijing Komiti blong Hed Kampani i wantem se long ol video blong yumi, i gat ol defdefren kalja mo ples. Hemia from we yumi wan famle blong ol brata mo sista long fulwol, mo yumi wantem soemaot samting ya. Taswe, i gat 24 tim long 11 kantri we oli wok long projek ya. I nidim plante mane, gudfala plan, mo fasin blong wok gud tugeta, blong mekem bigfala wok ya long ol defren ples long wol.”

Blong mekem plante long ol video ya, i nidim ol spesel tul, mo oli mas wokem ol spesel haos blong aktem ol video ya. Long saed blong muvi ya Nehemaea: “Glad We i Kamaot Long Jehova, Hem i Strong Ples Blong Haed,” oli bildim ol samting ya insaed long Mt. Ebo studio, klosap long Patterson, New York, long Amerika. Ol brata oli wantem yusum gud ol presen mane, mo long semtaem wokem ol haos we oli stret long taem bifo, taswe oli bildim ol pis we oli no hevi mo oli luk olsem stonwol blong Jerusalem bifo. Wanwan pis we i hae olsem 6 meta, oli wokem frem long timba, mo oli kavremap wetem fom we i no hevi nating, nao oli pentem blong mekem i luk olsem wan stonwol. Oli save karem ol “stonwol” ya oli go long ol defren ples we oli nidim, mekem se oli no nid blong bildim bakegen. Nating se i olsem, oli yusum klosap 11,154,000 vatu blong wokem ol haos mo ol nara samting blong muvi ya.a

Taem yumi save ol samting ya, yumi tinghae moa long program blong bigfala asembli long yia ya. Yumi gat strong tingting se ol hadwok blong rerem program ya bambae i leftemap nem blong Jehova long fulwol. Tangkiu tumas long presen mane we yu givim tru long donate.jw.org mo long ol narafala rod.