?From Wanem Ol Witnes Blong Jehova Oli No Mekem Lafet Blong Betde?
Ol Witnes blong Jehova oli no mekem lafet blong betde from we oli bilif se God i no laekem. I tru se Baebol i no talemaot stret se yumi no mas mekem lafet blong betde, be i givhan long yumi blong tingting gud mo kasem save long tingting blong God. Tingbaot fo poen mo ol tok blong Baebol we i sapotem olgeta.
Ol hiten man bifo oli mekem lafet blong betde. Buk ya Standard Dictionary of Folklore, Mythology, and Legend, we Funk & Wagnalls i wokem, i eksplenem se ol lafet blong betde oli stanap long bilif ya se long betde blong wan man, “ol rabis spirit mo rabis paoa oli gat janis blong atakem man ya,” mo “sipos ol fren oli stap mo talemaot hapi betde long hem, hemia i save protektem hem.” Buk ya The Lore of Birthdays i talem se long taem bifo, “blong yusum ol sta blong talemaot fiuja blong wan man, oli nidim” ol rikod blong betde blong hem. Buk ya i talem tu se “long ol kastom stori, ol kandel blong betde oli gat majik paoa blong mekem samting we man ya i wantem i kamtru.”
Be Baebol i talem se yumi no mas mekem majik, talemaot ol samting we oli haed, wok wetem ol rabis spirit, mo ol narafala samting olsem. (Dutronome 18:14; Galesia 5:19-21) Blong talem stret, wan risen from wanem God i jajem taon ya Babilon bifo, hemia from we ol man blong hem oli stap yusum sta blong talemaot fiuja mo ol samting we i haed. (Aesea 47:11-15) Ol Witnes blong Jehova oli no traem blong save se evri kastom i kamaot wea, be taem Baebol i talem klia ol samting we God i no laekem, mifala i folem.
Ol fas Kristin oli no mekem lafet blong betde. The World Book Encyclopedia i talem se ol fas Kristin “oli tingbaot lafet blong betde olsem wan kastom blong ol hiten man.” Baebol i soemaot se ol aposol mo ol narafala we Jisas i tijim olgeta, oli givim eksampol we ol Kristin oli mas folem.—2 Tesalonaeka 3:6.
I gat wan lafet nomo we ol Kristin oli mas mekem, hemia ded blong Jisas, be i no betde. (Luk 22:17-20) Yumi no sapraes long samting ya, from we Baebol i talem se “dei we man i ded long hem, i gud moa i bitim dei we man i bon long hem.” (Prija 7:1) Long en blong laef blong Jisas long wol, hem i gat gudnem wetem God, taswe dei blong ded blong hem i moa impoten i bitim dei we hem i bon long hem.—Hibru 1:4.
Baebol i no tokbaot wan man blong God we i mekem lafet blong betde. Hemia i no min se ol man we oli raetem Baebol oli mestem, from we Baebol i tokbaot tu lafet blong betde we ol man we oli no wosipim God oli mekem. Be Baebol i tokbaot nomo ol nogud samting we oli hapen long tufala taem ya.—Jenesis 40:20-22; Mak 6:21-29.
?Ol pikinini blong ol Witnes oli harem nogud from we oli no mekem lafet blong betde?
Olsem ol narafala gudfala papa mo mama, ol Witnes tu oli soemaot lav long ol pikinini blong olgeta long ol defdefren taem blong yia, taem oli givim presen long olgeta mo mekem smol pati blong oli harem gud. Oli traem folem nambawan eksampol blong God, we i givim ol gudfala samting long ol pikinini blong hem enitaem nomo. (Matiu 7:11) Taswe ol pikinini blong ol Witnes oli no harem nogud. Traem luk wanem we samfala oli talem:
“I moagud blong kasem wan presen taem yu sek long hem nomo.”—Tamy we i gat 12 yia.
“Mi no kasem ol presen long betde blong mi, be papa mo mama blong mi i pem ol presen blong mi long ol narafala taem blong yia. Mi laekem moa olsem from we mi mi sapraes.”—Gregory we i gat 11 yia.
“?Yu ting se ten minit, smol kek, mo wan singsing, i mekem wan gudfala pati? I gud yu kam long haos blong mi. !Bambae yu luk se wan trufala pati i olsem wanem!”—Erik we i gat 6 yia.