?Ol Witnes Blong Jehova Oli Kasem Mane Olsem Wanem?

Wok blong ol Witnes blong Jehova long fulwol i gohed from presen mane we olgeta oli givim.a Oli putum presen mane long ol bokis blong presen mane long ol haos miting blong olgeta. Mo pej we i tokbaot Presen Mane long websaet ya i talem sam narafala rod blong givim presen mane. Oli save jusum blong givim presen mane blong givhan long wok blong ol Witnes long fulwol, o blong givhan long kongregesen blong olgeta, o tufala tugeta.

I no gat wan stret amaon we ol Witnes wanwan oli mas givim, oli no pem taet, mo oli no givim haf blong pei we oli kasem long wok, nogat. (2 Korin 9:7) Mifala i neva mekem kleksin, ol man oli no pem blong kam insaed long ol miting, mo ol minista blong mifala oli no askem ol man blong pem olgeta taem oli baptaesem olgeta, mekem sevis blong berem dedman o blong maredem man mo woman, mo ol narafala sevis olsem. Mifala i no mekem fanresing, olsem salem kakae, mekem maket, plei bingo, mekem lafet, lotri, mo ol narafala samting olsem. Ol man oli no save nem blong olgeta we oli givim mane mo hamas oli givim. (Matiu 6:2-4) I no gat ol pablisiti long websaet mo long ol buk blong mifala, blong pulum ol man blong oli givim mane.

Long evri kongregesen blong ol Witnes blong Jehova, oli mekem wan ripot evri manis long saed blong mane we kongregesen i gat, mo ol man oli harem ripot ya. Oli jekem ol akaon blong kongregesen oltaem blong meksua se oli stap yusum gud ol presen mane.—2 Korin 8:20, 21.

Ol Rod Blong Givim Presen Mane

• Ol bokis blong presen mane: Yu save putum presen mane o jek long bokis blong presen mane long Haos Kingdom, Haos Asembli, o eniples we ol Witnes oli mekem miting.

• Givim presen mane long Intenet: Long plante kantri, yu save yusum “Donate to Jehovah’s Witnesses” long jw.org blong givim presen mane. Yu save yusum kredit kad, debit kad, bang transfer, mo sam narafala rod.b Sam Witnes oli mekem desisen blong “putum sam samting i stap” evri manis, taem oli setemap plan ya blong mane i kamaot otomatik evri manis.—1 Korin 16:2.

  

• Stanemap wan plan blong givim presen mane: Long saed blong sam rod blong givim presen mane, yu mas stanemap wan plan fastaem o kasem advaes long wan loea. Long sam kantri, presen mane i save kamaot long takis we yu mas pem. I gud blong kasem save moa long mane we yu save givim olsem presen taem yu laef, o afta we yu ded. Plis toktok long branj ofis blong ol Witnes blong Jehova blong kasem save moa, sipos yu wantem givim presen mane tru long:

  • akaon long bang

  • insurens mo ol plan blong ritae

  • real estate

  • share mo bond

  • lastok blong yu bifo we yu ded mo mane long wan spesel akaon

Blong kasem save moa long ol rod blong givim presen mane long ples blong yu, plis luk “Donate to Jehovah’s Witnesses” long jw.org.