‘Wok Blong Masta Blong Yumi, i Mas Gat Frut Blong Hem’
1 !Ating ol tok ya oli leftemap tingting blong yu bigwan! From oli mekem yu tingbaot se, wok blong Jehova we yu mekem, i no blong nating nomo, be i mas gat frut blong hem. (1 Kor. 15:58) Yu traem tingbaot ol man we oli wantem tumas blong kasem haenem, mo gat plante mane. Ating ol man ya bambae oli spenem plante yia long hae skul, no maet oli wok had blong kasem plante samting. Be from we “samting we yumi no tingbaot i save kamaot long yumi enitaem nomo,” i mekem se samtaem, yumi no save kasem samting we yumi stap traehad from. No maet i gat sam samting oli hapen long laef blong yumi, we i mekem se yumi save laef wetem smol samting nomo. Taem samting olsem i hapen, traehad we ol man ya oli mekem i blong nating nomo, i olsem we oli stap “resis olbaot nomo.” (Pri. 1:14; 9:11) Taswe, i impoten tumas we yumi traehad blong mekem wok blong Jehova. !From we wok ya i bambae i gat frut blong hem blong olwe!
2 Wan Wok We i Gat Bigfala Mining: Wok ya blong talemaot gud nius blong Kingdom blong God, hem i impoten moa i bitim ol narafala wok long wol. Taswe, yumi mas mekem wok ya, nating we ol man oli wantem lesin no nogat. Yumi wantem talem sem tok olsem Pol, we i talem se: “Mi mi talemaot naoia long fes blong God, se sipos wan long yufala i lus, be i no fol blong mi, from we mi mi no haedem wan samting long yufala, mi talemaot finis long yufala, olgeta samting we God i wantem.”—Wok 20:26, 27.
3 ?Yu yu harem olsem wanem, taem wan man i lesin long gud nius blong Kingdom? !I sua se yu yu glad tumas! Wan yangfala woman i lusum anti blong hem long ded. Nao hem i stap tingting se, anti blong hem i go stap wea, ?long heven no long hel? Ale, hem i prea long God blong i givhan long hem. Mo hem i yusum nem blong God Jehova long prea blong hem, olsem we sista blong hem i tijim hem blong mekem. Smoltaem biaen, hem i stat blong stadi long Baebol mo i go long ol Kristin miting. Laef blong hem i jenis bigwan. Hem i no moa joen wetem ol yangfala we oli stap mekem trabol olbaot long rod. Hem i lego smok, i no moa tekem drag, mo i no moa stil. Hem i talem se: “Wan samting nomo i mekem se mi mi naf blong lego rabis laef ya blong mi, hemia from we mi mi lavem Jehova. Mo Jehova i sore long mi, hem i givim janis long mi blong mi save kasem laef we i no save finis.” Hem i no moa yusum laef blong hem blong ronem ol samting we oli blong nating nomo.
4 Nating we ol man oli no wantem lesin long yumi, be oli save se ol Witnes blong Jehova oli kam visitim olgeta. Taswe yumi mas gohed nomo. Sipos yumi mekem olsem, hemia i pruvum long olgeta se yumi fasgud long Jehova, yumi holemstrong long hem mo yumi lavem olgeta. From samting ya, ?wok we yumi mekem, i blong nating nomo? !Nogat, i mas gat frut blong hem!