Baebol i Talem Wanem
?God i Rili Kea Long Ol Pikinini?
EVRI yia ol man oli mekem i nogud long plante handred milian pikinini. Maet oli fosem ol pikinini ya blong wok bitim mak, maet oli mekem i strong tumas long olgeta, no maet oli kilim olgeta nogud. Plante pikinini oli wok olsem slef nomo long ol ples we i denja. Plante narawan, sam man oli stilim olgeta mo fosem olgeta blong kam soldia long ami, no blong mekem wok blong woman blong rod. Plante pikinini oli no moa trastem ol bigman, from we maet wan famle i stap mekem i nogud long olgeta long saed blong seks, no sam narafala bigman oli stap spolem olgeta long ol narafala fasin.
Yumi kasem save from wanem ol man we hat blong olgeta i stret mo we oli gat sore, oli wari long ol pikinini. Samfala oli agri se ol sinman we oli griri mo oli gat ol narafala rabis fasin, olgeta nao oli mekem nogud long ol pikinini. Be maet oli tingting tu se God i no gat lav, from we hem i letem ol fasin ya oli gohed. Maet oli harem se God i lego ol pikinini ya finis mo se hem i no kea long olgeta. ?Olsem wanem? ?Tingting ya i tru? ?Ol nogud fasin ya we plante man oli mekem long ol pikinini, oli soem se God i no kea long olgeta? ?Baebol i talem wanem?
God i Agensem Ol Man We Oli Spolem Ol Pikinini
Jeova God i no wantem se ol bigwan oli mekem ol rabis samting long ol pikinini blong spolem olgeta. Hemia frut blong stronghed fasin we i kamaot long garen blong Iden, mo hem i moa nogud i bitim plante narafala frut. Taem Adam, Iv, mo Setan, trifala i no moa wantem se God i rul long olgeta long garen blong Iden, trifala i openem rod blong ol man oli mekem ol nogud fasin blong spolem ol narafala.—Jenesis 3:11-13, 16; Prija 8:9.
God i no laekem nating fasin ya blong spolem ol pikinini we oli no gat paoa mo we oli no naf blong blokem olgeta. Plante laen blong man bifo we oli no man blong Jeova, oli kilim ol pikinini olsem sakrefaes blong mekem wosip long ol giaman god blong olgeta. Be Jeova i ‘no talem se bambae oli mekem olsem, mo samting ya i no kamaot long tingting blong hem nating.’ (Jeremaea 7:31) God i givim woning long ol man long taem bifo, se: “Sipos yufala i mekem i strong long [ol pikinini we oli no gat papa], nao oli krae i kam long mi blong mi givhan long olgeta, bambae mi mi save harem olgeta. Nao bambae mi kros long yufala.”—Eksodas 22:22-24.
Jeova i Lavem Ol Pikinini
Ol waes advaes we God i givim long ol papa mama i soemaot se hem i lavem ol pikinini. Ol pikinini we oli stap long wan gudfala famle, oli gat janis blong gruap wetem ol gudfala fasin mo blong kam bigman long tingting blong olgeta. Taswe God i stanemap mared olsem wan plan we i mas stap blong ful laef blong man mo woman. Folem plan ya, “man i mas aot long papa mo mama blong hem, i mas go joen wetem woman blong hem, nao tufala bambae i kam olsem wan bodi nomo.” (Jenesis 2:24) Baebol i talem se man mo woman tufala i gat raet blong slip tugeta afta we tufala i mared nomo. Olsem nao, sipos tufala i gat pikinini, tufala i save lukaotgud long olgeta insaed long wan famle we i stanap strong.—Hibrus 13:4.
Baebol i makemgud se ol papa mama oli mas tijimgud ol pikinini blong olgeta. Hem i talem se: “Ol pikinini ya blong yumi, hemia wan presen we Hae God i givim long yumi, wan gudfala samting we hem i givim blong leftemap yumi. Ol pikinini we man i bonem taem i yang yet, . . . oli olsem ol ara long han blong soldia.” (Ol Sam 127:3, 4) Ol pikinini oli olsem wan sas presen we God i givim long yumi, mo hem i wantem se oli haremgud. God i talem long ol papa mama blong oli soemaot rod long ol pikinini blong olgeta, olsem wan soldia we i sutum ara i go stret long mak blong hem. Tok blong God i givim advaes ya, se: “Ol papa. . . . Bambae yufala i no mas mekem ol samting long ol pikinini blong yufala we i save mekem olgeta oli kros. Yufala i mas lukaot gud long olgeta. Yufala i mas stretem olgeta, mo yufala i mas tijim olgeta, olsem we Masta blong yumi i stap stretem yumi, i stap tijim yumi.”—Efesas 6:4.
Wan narafala rod blong Jeova blong soem lav long ol pikinini, hemia tru long tijing we hem i givim long ol papa mama, blong oli save protektem ol pikinini blong olgeta long ol man nogud. Long Isrel bifo, God i talem se “ol pikinini” tu oli mas lesin long Loa. Wan samting we Loa i tokbaot, hemia stret rod blong man mo woman i slip tugeta, mo ol rabis fasin long saed blong seks we oli no mas folem. (Dutronome 31:12; Levitikas 18:6-24) God i wantem se ol papa mama oli mekem evri samting we oli save mekem, blong protektem pikinini blong olgeta long eniman we i traem blong spolem olgeta no mekem nogud long olgeta.
Wan Gudfala Hop Blong Ol Pikinini
Jisas Kraes i mekem evri samting folem fasin blong Papa blong hem. Taswe long nambawan fasin, hem i soemaot bigfala lav we Jeova i gat long ol pikinini. (Jon 5:19) Wan taem, ol aposol blong Jisas oli ting se oli stap mekem i gud long hem. Oli girap, oli blokem ol papa mama blong oli no karem ol pikinini blong olgeta oli kam long Jisas. Be Jisas i tok strong long olgeta, i se: “!Yufala i no blokem ol pikinini ya!” Nao ‘hem i putum han blong hem i goraon long ol pikinini ya, mo i blesem olgeta.’ (Mak 10:13-16) Yes, ol pikinini oli impoten long tingting blong Jeova God mo Pikinini blong hem.
I no longtaem, bambae God i yusum King we hem i putumap, Jisas Kraes, blong givhan long ol pikinini ya we ol man oli stap mekem raf fasin long olgeta. Ol griri man we oli yusum ol pikinini, mo oli no gat sore, mo oli mekem nogud long olgeta, bambae oli lus blong olwe. (Ol Sam 37:10, 11) Long saed blong olgeta we oli gat tingting daon mo oli lukaot Jeova, Baebol i talem se: “Hem bambae i ravemaot wota blong ae blong olgeta. Nao bambae i no moa gat man i ded, mo bambae man i no moa krae from man we i ded. Bambae i no moa gat man i krae, mo bambae man i no moa harem nogud long bodi blong hem. Ol samting ya blong bifo oli lus olgeta.”—Revelesen 21:3, 4.
Tede tu, God i stap soemaot lav blong hem taem hem i givhan long saed blong spirit mo filing long ol pikinini we ol man oli yusum olgeta mo mekem nogud long olgeta. Hem i promes se: “Ol sipsip blong mi we oli lus, mi bambae mi go lukaot olgeta, mo olgeta we oli mestem rod, oli stap wokbaot olbaot, mi bambae mi tekem olgeta i kambak. Mo olgeta we oli karekil, bambae mi fasem ol soa blong olgeta blong mekem olgeta oli kam gud bakegen, mo olgeta we oli no strong, bambae mi lukaot gud long olgeta blong mekem olgeta oli kam strong bakegen.” (Esikel 34:16) Jeova i stap yusum Tok blong hem, wetem tabu spirit mo Kristin kongregesen tu, blong mekem ol pua pikinini oli haremgud bakegen long ol nogud fasin we ol man oli mekem long olgeta blong daonem mo spolem olgeta. Yumi glad tumas blong save se naoia mo long fiuja, ‘Papa blong yumi we i gat sore, mo we hem i stamba blong fasin blong givhan, hem i stap givhan long yumi long olgeta trabol blong yumi, blong mekem yumi harem gud.’—2 Korin 1:3, 4.
[Foto Credit Line blong pija long pej 20]
© Mikkel Ostergaard /Panos Pictures