Buk We i Defren Long Ol Narafala Buk

“Baebol i wan buk we i kasem plante moa man i bitim olgeta narafala buk.”—The World Book Encyclopedia.

BITIM 550 yia bifo, wan man Jemani we i stap wokem ol niufala samting, nem blong hem Johannes Gutenberg, i wokem wan mesin we i save printim ol buk. Faswan impoten buk we hem i printim, hemia Baebol.a Afta long taem ya, ol man oli printim plante taosen milian buk we oli tokbaot evri samting. Be, Baebol nao i moagud i bitim olgeta evriwan ya.

◼ Maet i gat samwe long 4.7 taosen milian Baebol (ful Baebol no haf blong hem) we ol man oli bin wokem. Hemia i faef taem antap long namba blong wan narafala impoten buk (Quotations From Chairman Mao), we hem i namba tu buk blong kasem plante moa man i bitim ol narafala buk.

◼ Long wan yia nomo, oli givimaot bitim 50 milian Baebol, sam oli fulwan Baebol, sam oli haf nomo. Wan magasin (The New Yorker) i talem se: “Evri yia, oli salem plante moa Baebol i bitim ol narafala buk.”

◼ Oli tanem Baebol fulwan no sam haf blong hem i go long 2,400 lanwis. Bitim 90 pesen blong olgeta man long wol oli save ridim sam haf blong Baebol long lanwis blong olgeta.

◼ Klosap stret haf blong ol man we oli raetem Baebol, oli finisim wok blong olgeta bifo we waes man ya blong Jaena, nem blong hem Confucius, mo man we i stanemap skul Buda, nem blong hem Siddhārtha Gautama, tufala i bon.

◼ Baebol i bin gat bigfala paoa long ol man we oli droem pija, wokem miusik, mo raetem buk, mo yumi luksave samting ya long sam long ol beswan pija, miusik, mo buk long wol.

◼ I no gat wan narafala buk we i stapgud olsem Baebol, nating se ol man oli traem blong spolem. Plante gavman oli bin putum tabu long Baebol, plante man blong jos oli bin bonem ol Baebol, mo plante man oli bin tok agensem Baebol. Be oli no spolem Baebol. Baebol i stap yet.

Ol poen ya antap oli ol bigfala trutok. Be i no ol bigfala samting olsem mo ol bigfala namba we oli soemaot se yumi save trastem Baebol. Naoia, bambae yumi tokbaot faef risen from wanem plante milian man oli bilif strong se i stret blong trastem Baebol.

[Futnot]

[Tok blong pija long pej 4]

Mesin blong Gutenberg we i printim ol buk, mo wan pej blong Baebol blong hem

[Credit Line]

Press: Courtesy American Bible Society; page: © Image Asset Management/age fotostock