?From Wanem Yumi Save Trastem Baebol?
3. Ol Tok Oli Laenap Gud
Tingbaot sipos yu askem long 40 man we oli kamaot long ol defdefren kaen laef, blong oli raetem wan buk. Wanwan long olgeta bambae oli raetem wan haf blong buk ya. Ol man ya oli stap long ol defdefren kantri mo oli no savsave olgeta. Sam long olgeta oli no save wanem we ol narafala oli raetem. ?Olsem wanem? ?Yu ting se ol tok insaed long buk ya bambae oli laenap gud?
BAEBOL nao i wan buk olsem.a Nating se ol samting long saed blong ol man we oli raetem Baebol mo fasin blong raetem i defdefren moa i bitim buk we yumi tokbaot long haf antap, be ol tok blong Baebol oli laenap gud mo oli tru.
Laef blong ol man we oli raetem Baebol i defdefren tumas. Ol man oli tekem 1,600 yia blong raetem Baebol, i stat long yia 1513 B.K.T. i go kasem yia 98 K.T.b Taswe, plante long ol 40 man we oli raetem Baebol oli no stap laef long semtaem, samfala oli laef plante handred yia afta long ol narawan. Ol man ya oli mekem ol defdefren wok. Samfala oli man blong hukum fis, sam narafala oli man blong lukaot long sipsip, samfala oli king, mo wan hem i dokta.
Wan stamba tok nomo long Baebol. Ol man we oli raetem Baebol, stamba tok blong evriwan hemia: God bambae i pruvum se hem i gat raet blong rul long ol man, mo bambae Kingdom blong hem long heven i rulum fulwol mo mekem plan blong hem i kamtru. Stamba tok ya i kamaot long Jenesis fastaem, i kam klia moa long ol buk biaen long Jenesis, mo i kasem fulmak blong hem long buk blong Revelesen.—Ridim haf ya “?Baebol i Tokbaot Wanem?” long pej 19.
Ol smosmol save long Baebol olgeta tu oli laenap gud. Ol smosmol save long ol stori we ol man oli raetem long Baebol, olgeta tu oli laenap gud, nating se ol man ya oli no joen wanples blong tokbaot ol save ya fastaem. Tingbaot wan stori. Jon i talem long buk blong hem se taem wan bigfala hip blong man oli kam blong lesin long Jisas, Jisas i askem long Filip weples oli save pem bred blong givim long ol man ya blong oli kakae. (Jon 6:1-5) Long Gospel blong Luk we i talem semfala stori ya, hem i talem se samting ya i hapen klosap long taon ya Betsaeda. Mo long fashaf blong buk blong Jon, Jon i talem se Filip i man Betsaeda. (Luk 9:10; Jon 1:44) Taswe, Jisas i bin askem kwestin ya long saed blong kakae long Filip, wan man Betsaeda we hem i savegud ples ya we oli stap long hem. Ol stori ya oli laenap gud, be i klia se ol man oli no toktok tugeta fastaem blong mekem se ol tok blong olgeta oli laenap.c
Sam samting we oli defdefren be oli stret nomo. I gat sam samting we oli defdefren long sam stori blong Baebol, be hemia i stret nomo. Tingbaot: ?Sipos plante man oli luk wan rabis man i kilim narafala, nao wanwan long olgeta oli talemaot samting we oli luk, yu ting se olgeta evriwan bambae oli yusum ol semfala tok mo talemaot ol semfala samting? Sipos evriwan oli talem sem samting, bambae yu mas ting se oli bin toktok tugeta fastaem. Taswe, i stret nomo we toktok blong olgeta wanwan i defdefren folem ples we oli stap long hem mo samting we oli luk. Sem mak long ol man we oli raetem Baebol.
Yumi tekem wan eksampol. ?Long dei we Jisas i ded, hem i bin werem wan kot we kala blong hem i pepol (red mo i blu lelebet), olsem Mak mo Jon i talem? (Mak 15:17, Good News Bible; Jon 19:2, Good News Bible) ?No kot ya i red, olsem Matiu i talem? (Matiu 27:28) Blong talem stret, tufala tugeta i stret. Kala ya pepol i gat red insaed long hem. Laet we i saen long kaliko ya mo ples we ol man oli stanap long hem, i save mekem se wan kala i kamaot strong moa i bitim narafala kala, ale sam man oli luk se kot ya i pepol, samfala oli luk se i red.d
From we ol tok blong ol man we oli raetem Baebol oli laenap gud, nating se oli no toktok tugeta fastaem, hemia i pruvum bakegen se yumi save trastem Baebol.
[Ol futnot]
a Baebol i gat 66 buk no haf blong hem, i stat long faswan, hemia Jenesis, i go kasem laswan, Revelesen.
b B.K.T. i minim Bifo Kristin Taem, mo K.T. i minim Kristin Taem.
c Blong faenem sam narafala stori we oli laenap gud, lukluk pej 16-17 blong buk ya A Book for All People (Un livre pour tous), we ol Witnes blong Jeova oli wokem.
d Blong kasem moa save, lukluk buk ya we ol Witnes blong Jeova oli wokem, The Bible—God’s Word or Man’s? (La Bible : Parole de Dieu ou des hommes ?) long japta 7, “Does the Bible Contradict Itself?” (“La Bible se contredit-elle?”).
[Tok blong pija long pej 7]
?Kot blong Jisas i pepol no i red?