‘Lesin Gud Long Ol Tok We Yu Harem’

FASIN blong lesin gud i impoten tumas taem yumi wantem lanem samting. Mo tu, fasin ya i save sevem laef blong yumi. Taem Jehova i wokem rod blong tekemaot ol man blong hem long Ijip, hem i talem sam tok long Moses, nao Moses i talemaot ol tok ya long ol olfala blong Isrel. Ol tok ya oli talem wanem samting we ol man Isrel oli mas mekem blong enjel i no kilim ol fasbon boe blong olgeta i ded. (Eks. 12:21-23) Ol olfala blong Isrel oli talemaot ol tok ya long ol famle. Oli no raetem ol tok ya long pepa. Ol man oli mas lesin gud. ?Taem ol man ya oli harem tok ya, oli mekem wanem? Baebol i talem se: “Olgeta laen blong Isrel ya oli obei long tok ya blong Hae God, mo oli mekem olgeta samting we hem i talem long Moses mo Eron.” (Eks. 12:28, 50, 51) Ale, from we ol man Isrel oli lesin gud, God i wokem sam bigbigfala merikel blong mekem olgeta oli gofri.

Tede, Jehova i stap wokem rod blong sevem yumi long wan trabol we i bigwan moa. Taswe, yumi mas lesin gud long ol tok blong hem. Yumi stap kasem ol tok ya long ol miting blong kongregesen. ?Olsem wanem? ?Yu tu yu stap kasem ol gudfala samting ya long ol miting? Sipos yu wantem kasem, yu mas lesin gud.

?Yu yu rimemba ol bigfala poen we oli kamaot long ol miting? ?Yu yu stap traehad evri wik blong mekem ol tok we yu harem long ol miting oli wok long laef blong yu? ?Yu yu stap serem ol tok ya wetem ol narafala?

Yu Mas Rerem Hat Blong Yu

Blong kasem olgeta gudfala samting we oli kamaot long ol Kristin miting, yumi mas rerem hat blong yumi. Samting we i hapen long taem we King Jeosafat i rul long Juda, i soemaot se i impoten tumas blong rerem hat blong yumi. Jeosafat i strong blong leftemap tru wosip. Hem i “brekemdaon olgeta ples blong mekem wosip long ol narafala god, mo i stap katemdaon ol aedol blong woman god ya Asera.” Nao hem i talem long ol prins, ol Livaet, mo ol pris, se oli mas tijim ol man long olgeta taon blong Juda long saed blong ol Loa blong Jehova. Nating se i olsem, “ol haeples ya blong mekem wosip long ol narafala god oli no lus evriwan.” (2 Kron. 17:6-9; 20:33, NW) Plante man oli strong blong mekem wosip long ol narafala god. Oli mekem giaman wosip long ol haeples ya tu mo oli talem se wosip ya i go long Jehova. Taswe, oli no brekemdaon ol haeples ya evriwan.

?From wanem ol tijing we Jeosafat i givim oli no givhan long ol man ya blong oli obei fulwan? Stori i gohed se: “Oli no rerem hat blong olgeta.” Oli harem ol tijing ya, be oli no mekem i wok long laef blong olgeta. Maet oli ting se i hadwok tumas blong wokbaot i go long Jerusalem blong mekem sakrefaes. Nating se i olsem wanem, i klia se bilif i no gat paoa long hat blong olgeta.

Sipos yumi no wantem gobak long wol blong Setan, yumi mas rerem hat blong yumi blong kasem ol tijing we Jehova i stap givim long yumi tede. ?Yumi mas mekem wanem blong rerem hat blong yumi? Wan impoten rod, hemia prea. Yumi mas prea se bambae yumi tinghae long ol tijing blong God we yumi kasem. (Sam 27:4; 95:2) Samting ya bambae i givhan long yumi blong yumi harem gud tumas long ol brata we oli traehad blong tijim yumi. Nating se ol brata ya oli sinman, be oli glad nomo we Jehova i yusum olgeta blong tijim ol man blong hem. Sipos yumi tinghae long ol tijing blong Jehova, bambae yumi wantem tumas blong talem tangkiu long hem from ol niufala save we yumi stap lanem, mo tu, from we yumi gat janis blong kasem save moa long ol samting we yumi lanem finis. Yumi wantem tumas blong mekem olgeta wok we God i givim long yumi, taswe yumi prea se: “Hae God, plis yu tijim mi long ol samting we yu wantem blong mi mi mekem. . . . Yu mekem we mi bambae mi wantem tumas blong mekem ol wok blong yu nomo.”—Sam 86:11.

Yu No Mas Letem Tingting i Flae Olbaot

Plante samting oli save mekem se yumi no lesin gud. Maet yumi stap tingting long sam trabol we yumi fesem. Maet i gat noes insaed no afsaed long ples blong miting, no maet ol man oli stap gokam. Sipos yumi sik lelebet, i hadwok blong putum tingting blong yumi i stap long wanem we yumi harem. Olgeta we oli gat pikinini, oli luk se plante taem oli no stap lesin gud. ?Wanem i save givhan long yumi blong yumi putum tingting blong yumi i stap long ol tok we yumi lesin long hem?

Samting we yumi lukluk, hemia nao samting we bambae yumi tingting long hem. Taswe, i gud yu lukluk i go nomo long brata we i stap givim tok, nao bambae i isi moa blong yu yu putum tingting blong yu i stap long wanem we yu harem. Taem brata ya i talem wan vas blong Baebol, i gud yu faenem vas ya mo yu folem long Baebol blong yu, nating se yu save gud vas ya. Sipos i gat wan noes, yu no mas tanem hed blong yu i go long ples we noes ya i stap kamaot long hem. Sipos ae blong yu i stap pulum tingting blong yu i go olbaot, bambae yu mestem fulap save we i stap kamaot long miting.

Sipos i gat wan samting we i mekem se yu stap “tingting tumas,” bambae i had blong yu yu putum tingting blong yu i stap long ol tok we yu harem. I gud yu prea mo yu askem long Jehova blong i mekem tingting mo hat blong yu i kam kwaet, nao yu save lesin gud. (Sam 94:19; Fil. 4:6, 7) Maet yu mas prea olsem bakegen mo bakegen, sipos yu luk se i gat nid. (Mat. 7:7, 8) Jehova nao i mekem plan ya se yumi gat ol miting blong kongregesen. Yu save gat strong tingting se hem i wantem we yu yu kasem olgeta gudfala samting long ol miting ya.—1 Jon 5:14, 15.

Yu Mas Lesin Gud Long Ol Tok

Maet yu save rimemba sam gudfala poen we yu bin harem long ol tok. Be taem yumi lesin gud long wan tok, hemia i no min se yumi makem ol poen we yumi laekem nomo, nogat. Wan tok i olsem wan trip we man i mekem i go long narafala ples. Nating se man ya i luk plante naesfala samting long rod, impoten samting hemia ples we hem i stap go from. Maet brata we i givim tok i stap traem blong lidim ol man we oli lesin blong oli luksave ansa blong wan kwestin, no maet hem i stap traem blong pulum olgeta blong oli mekem sam samting long laef blong olgeta.

I gud yumi tingbaot ol tok we Josua i talem long neson blong Isrel. Ol tok ya oli stap long Josua 24:1-15. Hem i wantem pulum ol man Isrel blong oli stanap strong long tru wosip. Blong mekem olsem, oli mas seraot fulwan long ol giaman wosip blong ol kantri raonabaot long olgeta. ?From wanem samting ya i impoten tumas? From we, sipos ol man Isrel oli no lukaot gud, giaman wosip i save spolem olgeta, nao bambae oli no moa fren gud wetem Jehova. Ol man oli ansa long Josua se: “Hae God i God blong yumi, mo bambae mifala i no save lego hem blong go biaen long ol narafala god. . . . Bambae mifala tu i mas biaen long hem. Hem nomo i God blong yumi.” !Mo hemia nao wanem we oli mekem!—Jos. 24:16, 18, 31.

Taem yu stap lesin long wan tok, i gud yu traem luksave wanem samting nao we tok ya i mas mekem long yu. Mo i gud yu traem luksave se ol poen long tok ya oli mekem samting ya olsem wanem. Yu tingbaot wanem we tok ya i stap pulum yu blong mekem.

Yu Mas Lesin Gud Taem i Gat Kwestin Mo Ansa

Long Wajtaoa Stadi, Baebol Stadi Blong Kongregesen, mo long sam haf long Miting Blong Kingdom Wok, i gat kwestin mo ansa.

Taem yumi lesin long wan tok no stadi we i gat kwestin mo ansa long hem, i olsem we yumi joen long wan storian. Blong kasem plante gudfala samting long storian ya, yumi mas lesin gud. Yumi mas traem save rod we storian ya i stap go long hem. Mo yumi mas luksave se brata i mekem olsem wanem blong stamba tok blong hem mo ol bigfala poen oli kamaot klia. Taem hem i askem wan kwestin, yu traem tingbaot wanem ansa we bambae yu givim. Yu mas lesin gud taem ol narafala oli givim ansa, mo taem oli talem ol defren rod blong mekem ol poen oli wok long laef blong yumi. Ol tingting we narafala i talem oli save givhan long yu blong yu kasem save moa long ol poen we yu save finis. I gud yu tu yu givim ol ansa we oli soemaot bilif blong yu. Long rod ya, yu save givhan long ol narafala olsem we oli givhan long yu.—Rom 1:12.

Yu yu mas rere gud fastaem. Samting ya bambae i givhan long yu blong yu putum olgeta tingting blong yu i stap long stadi, mo blong yu kasem save long ol ansa we ol narafala oli givim. Sipos yu yu no gat taem blong rere gud ol haf we bambae yumi stadi long hem, i gud yu tekem smoltaem bifo long miting, blong yu lukluk ol bigfala poen long stadi. Sipos yu mekem olsem, bambae yu kasem save moa long stadi ya.

Yu Mas Lesin Gud Long Ol Asembli

Long ol asembli, i gat plante moa samting we oli save pulum tingting blong yumi i gowe long ol tok. Taswe maet i hadwok moa blong lesin gud. ?Wanem i save givhan long yumi?

Wan impoten samting, hemia blong slip gud long naet. Bifo we asembli i stat evri dei, yu mas putum stamba tok blong dei ya i stap gud long tingting blong yu. Yu save lukluk nem blong ol tok wanwan, mo yu traem tingbaot wanem save bambae i kamaot long ol tok ya. Yu jekemap ol vas long Baebol blong yu. Plante man oli raetemdaon ol bigfala poen blong ol tok, from we oli luk se samting ya i givhan long olgeta blong oli putum tingting blong olgeta i stap long asembli. I gud yu raetemdaon ol poen we yu wantem folem long laef blong yu mo long wok blong prij. Yu save tokbaot sam poen taem yu stap go long ples blong asembli mo taem yu stap kambak long haos. Samting ya bambae i givhan long yu blong yu rimemba ol save we yu kasem.

Yu Mas Trenem Ol Pikinini Blong Oli Lesin Gud

Ol Kristin papa mama oli save givhan long ol pikinini blong olgeta, nating se oli smol nomo, blong oli kam ‘waes, nao God i save sevem olgeta.’ Blong mekem olsem, oli mas tekem ol pikinini oli kam long ol miting blong kongregesen, mo long ol asembli tu. (2 Tim. 3:15) Fasin blong ol pikinini wanwan i no sem mak. Taswe ol papa mama oli mas waes taem oli stap givhan long ol pikinini blong olgeta blong oli lesin gud. Ol advaes we i kam biaen i save givhan long ol papa mama.

Taem yufala i stap long haos, yu save jusum wan taem we i stret blong ol smol pikinini blong yu oli sidaon blong ridim ol Kristin buk no blong lukluk ol pija long ol buk olsem. Yu no mas karem ol pleplei oli go long miting, blong ol pikinini blong yu oli save pleplei taem miting i stap gohed. Long Isrel bifo, ol pikinini oli stap long ol miting blong ‘harem tok blong God, mo blong lanem’ samting. Tede tu, ol pikinini oli save mekem sem mak. (Dut. 31:12) Sam papa mama oli givim buk we kongregesen i stap stadi long hem i go long pikinini blong olgeta, mo oli luk se hemia i givhan bigwan long pikinini blong i lesin gud long miting. Taem pikinini i kam bigwan lelebet, yu save givhan long hem blong i ansa long miting.

Baebol i mekem i klia se man we i obei long Jehova, hem i lesin long ol tok blong Jehova. Yumi luk samting ya long ol tok we Moses i talem long ol man Isrel, se: “Mi mi putum laef mo ded long fored blong yu, yes, ol tok blong blesem yu mo ol tok blong panisim yu. Yu mas jusum laef, . . . yu mas lavem Jehova, we i God blong yu, mo yu mas lesin long voes blong hem, mo yu mas fasgud long hem.” (Dut. 30:19, 20, NW) Tede, i impoten tumas we yumi lesin gud long ol tijing we Jehova i givim, mo yumi mekem olgeta oli wok long laef blong yumi. Sipos yumi mekem olsem, bambae God i glad long yumi mo bambae yumi kasem laef we i no save finis. !Yes, i impoten tumas we yumi obei long tok ya blong Jisas se: “Yufala i mas lesin gud long ol tok we yufala i harem”!—Luk 8:18, NW.