Taem Yu Finis Long Wok—?Yu Save Spenem Moa Taem Long Wok Blong Jeova?
1 Plante man we oli wok strong ful laef blong olgeta, oli wantem tumas blong tekem spel long wok blong olgeta from we oli taed finis long ol trabol mo hadtaem we i kamaot long wok. Be plante olfala we oli finis long wok, biaen oli faenem se oli les blong stap nating nomo, oli no moa kea long wan samting, mo oli harem olsem se oli stap kam olfala kwiktaem moa from we oli no wok. Mo tu, taem tingting i no bisi long wan wok, man i save wari tumas long laef blong hem wan. Wan niuspepa blong Brasil i talem se plante man we oli finis long wok blong olgeta oli komplen from we oli ‘no glad, oli kros blong nating, oli wari tumas, mo tingting blong olgeta i foldaon bigwan from we oli ting se man i no moa nidim olgeta no oli harem olsem se oli laef blong nating nomo.’
2 Be ol olfala Kristin oli harem i defren. Oli luk taem ya we oli finis long wok olsem wan janis blong statem wan niufala wok, hemia blong spenem moa taem long ol wok long saed blong spirit. Wan brata we i stat paenia tu wik afta we hem i kasem 65 yia blong hem, i talem se: “I neva gat wan taem long laef blong mi we i fulap gud long ol blesing i bitim ol ten yia ya we mi spenem long wok blong paenia.” Wan olfala man wetem woman blong hem, tufala i raetem se: “Ol beswan yia blong laef blong mitufala oli stat taem mitufala i statem wok blong paenia.” Yes, plante olfala oli luk se oli gat janis blong spenem moa taem long wok blong prij afta we oli finis long wok blong winim mane. Mo oli kasem ol rij blesing blong Jeova.
3 Stap Bisi Mo Karem Frut: Plante man mo woman we naoia oli finis long wok, oli gruap long wan laef we i no olsem laef blong ol yangfala tede. Ol olfala ya oli no bin gat plante samting blong mekem laef i isi mo oli lan blong wokhad taem oli yang nomo. Mo nating se oli no gat sem paoa olsem taem we oli yangfala, be plante long olgeta oli stap yet olsem man we oli wokhad. Wan branj ofis i talem se long teritori we hem i lukaot long hem, 22 pesen blong olgeta paenia—hemia i minim samwe long bitim 20,000 brata mo sista—oli gat raonabaot 60 yia. Ol olfala ya oli givhan bigwan long wok blong prij. Oli laef plante yia finis mo oli gat save mo ol gudfala Kristin fasin we oli leftemap tingting blong ol kongregesen we oli stap wok long olgeta.—Jem. 3:17, 18.
4 Fasin blong stap bisi long Kristin wok blong prij i givhan long sam olfala ya blong oli gat gudfala helt mo wan laef we i moa gud. Wan sista we i gat 84 yia mo i stat paenia afta we hem i finis wok, i talem se: “Taem mi mekem Baebol stadi wetem ol man, samting ya i givhan long tingting blong mi blong i stap wekap mo wokgud oltaem. Mi mi no gat wan trak, taswe mi wokbaot plante. Hemia i givhan bigwan long helt blong mi.” Wan olfala brata we i paenia wetem woman blong hem, tufala i talem se: “Wok blong prij i givhan long mitufala blong stap helti long tingting mo bodi tu. Mitufala i kampani oltaem tugeta. Mitufala i laf oltaem mo mitufala i harem gud long laef.”
5 Givhan Long Ples We i Nidim Moa Pablisa: Sam Kristin we oli finis long wok blong olgeta, mo maet oli gat inaf mane, oli muv i go long ol ples we i nidim moa man blong talemaot Kingdom. Sam narafala oli givhan long ol grup we oli toktok narafala lanwis long ples blong olgeta. Olsem aposol Pol, ol pablisa ya oli wok strong blong “mekem ol samting ya from gud nius blong Jisas Kraes, blong bambae [olgeta] tu [oli] save kasem ol gudgudfala samting we i blong olgeta we oli bilif long gud nius ya.”—1 Kor. 9:23.
6 Wan hasban mo waef blong hem we tufala pikinini boe blong tufala i gruap finis, tufala i statem wok blong paenia. Afta we tufala i spenem sam yia long wok ya, tufala i stat lanem lanwis Jaena. Naoia, tufala i bitim 70 yia finis, be tufala i glad tumas blong luk we Jaenis grup ya we tufala i bin wok wetem olgeta, naoia i gru i kam wan kongregesen. !Ol brata mo sista olsemia oli rili wan blesing long ol narafala Kristin!
7 Man i No Finis Long Wok Blong Prij Taem i Kam Olfala: Long wok blong winim mane, sam kantri oli putum wan stret yia we man i mas finis long wok, no i ritae. Be long Kristin wok blong God i no gat yia blong ritae. Yumi evriwan i mas gohed long wok ya we i soem bilif, ‘gogo kasem we olgeta samting ya i finis.’ (Mat. 24:13, 14) I tru se sam olfala oli faenem se oli no naf blong spenem plante taem long wok blong Jeova olsem bifo. !Be i leftemap tingting blong yumi bigwan taem yumi luk se ol olfala ya oli mekem wanem we oli naf blong mekem wetem fulhat blong olgeta! Tok blong God i talem klia long olgeta ya se bambae Jeova i no save fogetem wok mo lav we oli bin soem long nem blong hem.—Luk 21:1-4; Hib. 6:10.
8 Sipos yu yu stap kam klosap long taem we bambae yu finis long wok, ating yu save prea mo tingbaot olsem wanem bambae yu save yusumgud taem blong yu. Wetem help blong God, maet yu faenem se taem ya i givim janis long yu blong mekem moa wok blong presem Jeova mo kasem plante moa blesing.—Sam 148:12, 13.